Koreya ədəbiyyatından 3 kitab
Hvan Sok-yonq (1943) Mancuriyada anadan olub. 1993-cü ildə Şimali və Cənubi Koreya arasında sənətçilərin mübadiləsini təşviq etmək məqsədilə Şimala getdiyinə görə həbs edilib. Beş il sonra yeni prezident tərəfindən azadlığa buraxılıb. Koreyanın ən yüksək ədəbi mükafatlarının laureatıdır, əsərləri dünyanın müxtəlif ölkələrində nəşr olunub. 2025-ci ildə MATER 2–10 əsəri ilə Beynəlxalq Buker Mükafatının finalçısı, 2019-cu ildə ALAQARANLIQDA (AT DUSK) romanı ilə uzun siyahıya düşüb, PEN Tərcümə Mükafatına namizəd göstərilib, 2018-ci ildə Emil Gime Mükafatının qalibi olub və başqa mükafatlara layiq görülüb. Hvan Sok-yonq’un Alatoran Yayınlarında 3 romanı çıxıb. Hər üç əsəri koreya dilindən Bahar Əliyeva tərcümə edib. (Bahar Əliyeva Koreya Mədəniyyət Mərkəzinin (Korean Cultural Centre) baş mütəxəssisi / senior expertidir — bu mərkəz Azərbaycan Dillər Universitetində fəaliyyət göstərir — və Koreya dili, mədəniyyəti və əlaqələrinin təşviqi ilə məşğuldur.)
______________________________
“Mater 2–10” Hvan Sok-yonq’un müasir Koreya ədəbiyyatının ən güclü sosial romanlarından biridir. Əsər dəmir yolu xəttinin adı ilə simvollaşdırılan bir məkanda üç nəsil dəmir yolu işçisinin taleyi üzərindən Koreyanın XX əsrdə yaşadığı tarixi sarsıntıları — müstəmləkə dövrünü, müharibəni, bölünməni və sənayeləşməni təsvir edir. Roman ailə yaddaşı, əmək, sinfi mübarizə və insan ləyaqəti mövzularını dərin humanist baxışla birləşdirərək şəxsi talelərlə milli tarixin necə iç-içə keçdiyini göstərir.
*
“Tanış şeylər” (Familiar Things) — Hwang Sok-yong’un müasir şəhər həyatının kölgəsində qalan insan talelərini təsirli şəkildə canlandıran romanıdır. Əsər Seulun kənarındakı köhnə bir məhəllədə yaşayan sakinlərin gündəlik “adi” əşyalar və xatirələr vasitəsilə yaddaş, yoxsulluq, urbanizasiya və məcburi dəyişikliklərlə üzləşməsini göstərir. Söküntü təhlükəsi altında olan məkan, “tanış şeylər”in tədricən yoxa çıxması fonunda insan ləyaqəti və icma ruhu barədə güclü humanist suallar doğurur. Roman sadə detalların içində böyük sosial həqiqətləri açan poetik-realistik üslubu ilə seçilir.
*
“Alaqaranlıqda” (At Dusk) — Hwang Sok-yong’un insan taleyi, yaddaş və mənəvi məsuliyyət mövzularına həsr olunmuş dərin psixoloji romanıdır. Əsər Cənubi Koreyanın sürətli modernləşməsi fonunda kənddən şəhərə miqrasiya, yoxsulluq, zorakılıq və sosial ədalətsizlik kimi problemləri bir insanın daxili dünyası prizmasından təqdim edir. “Alaqaranl;qda” adl; bu roman gün batımı metaforası ilə həyatın gec çağında insanın keçmişi ilə üzləşməsini, günah və vicdan arasında qalan yaddaşını poetik və sərt realizmlə ifadə edir.
