1. Biz elə bir cəmiyyətdə yaşayırıq ki, bağça və məktəb yaşında olan uşaqlarımıza dəyərli hədiyyə kimi kitab və uşaq oyuncağını deyil, bahalı planşet, mobil telefon, noutbook alırıq. Bunu almağa imkanı olmayanlara, almaq istəməyənlərə isə “geridə qalmış” kimi baxırıq.
2. Biz elə cəmiyyətdə yaşayırıq ki, rüşvət verməyən və almayan, tək maaşla yaşayan şəxsə pis baxırıq.
3. Biz elə cəmiyyətdə yaşayırıq ki, yaşından və cinsindən asılı olmayaraq ictimai yerlərdə telefondan, planşetdən çox zaman facebook və digər sosial şəbəkələrə, whatsapp, viberdə yazışmalar, müxtəlif oyunları oynamaq üçün istifadə edirik.
4. Biz elə cəmiyyətdə yaşayırıq ki, təhsil səviyyəsinin sıfır səviyyəsində olmasını söyləyirik, halbuki, elə biz uşaqlarımıza yüksək qiymət verməsi üçün müəllimlərə pul, hədiyyə veririk. Məktəbdə dərslərini vaxtında oxumadığı üçün savadı olmayan uşaqlarımızı təkrarən universitetə daxil olması üçün 2-3 il öncədən repetitor yanına hazırlığa göndəririk. Quyuya su tökməklə, quyu dolmaz.
5. Biz elə bir cəmiyyətdə yaşayırıq ki, uşağımızın səsi çıxmasın və bizə mane olmasın deyə hey televizor və ya noutbook önündə mənasız cizgi filmi və uşaq kanallarına baxmaqlarına, oyun oynamaqlarına etiraz etmirik.
6. Biz elə bir cəmiyyətdə yaşayırıq ki, dilənçilərimizi belə “şəhərli” və “rayonlu” kimi sosial təbəqələrə bölmüşük. Dilənçilərimiz də müasirləşib, yalanları, qarğışları, alqışları da zamanəyə uyğunlaşıb.
7. Biz elə bir cəmiyyətdə yaşayırıq ki, küçəyə və yerə zibil atmamaq üçün zibil atmaq üçün yer axtarırıq, gəzə-gəzə, axtara-axtara zibil atmaq üçün yerə, metrostansiyaların çöl giriş-çıxışının yanına, avtobus dayanacaqlarına və parklara, ən pis halda, əlində və ya cibində zibil evə və ya işə gəlib çıxırsan.
8. Biz elə cəmiyyətdə yaşayırıq ki, son zamanlar parklarımızda qoyulan yeni heykəl və ya büstlərə ürək ağrısı ilə baxırıq.
9.Biz elə bir cəmiyyətdə yaşayırıq ki, xəstələnmək istəmirik, xəstələndiyimiz halda, həkim qəbuluna getmək istəmirik, çünki bəzi savadsız və vicdansız həkimlər səhv diaqnoz qoyub təsirsiz və bahalı dərmanlar yazıb, bizi daha da xəstə edəcək. Bəzi həkimlərimiz pul naminə, əlavə qazanc əldə etmək üçün farmaseptik şirkət və apteklərlə əlbir olub bahalı və təsiri olmayan, müalicə etməyən dərmanlar yazacaqlar reseptlərində.
10.Biz elə bir cəmiyyətdə yaşayırıq ki, televizor, internet, mobil texnologiyaların inkişafı əsri olmasından sui istifadə edib gənclərimizi və gələcək nəslimizin savadını da, əxlaqını da, mənəviyyatını da, reytinq və pul, qazanc xətrinə qurban veririk.
11.Biz elə bir cəmiyyətdə yaşayırıq ki, bizə əxlaq və mənəviyyat dərsini bundan anlayışı olmayan şəxslər verir, onlar ekspert qismində çıxış edir.
12.Biz elə bir cəmiyyətdə yaşayırıq ki, qız və qadınlarımızda müasir gözəllik parametrləri onların təbii gözəllikləri deyil, süni şişirdilmiş dodaq, yanaq, sinə, arxa, yanları, çəkilmiş “nakolka” qaşları, taxma kirpikləri, dəfələrlə cərrahiyyə əməliyyatından çıxmış burunlarıdır.
13. Biz elə bir cəmiyyətdə yaşayırıq ki, soykökümüzü unudur, unutdurur, manqurtlaşırıq, harada nə pis cəhət, adət var, götürürük, nə şərq kimi şərqliyik, nə cənub kimi cənubluyuq, nə qərb kimi qərbliyik, nə də özümüz olub fərdiyik.
14. Biz elə cəmiyyətdə yaşayırıq ki, kimsə dara düşəndə inanmırıq, ya da videoya çəkib youtube və ya internetin digər saytlarına yerləşdirir, mediaya ötürürük, yerində kömək etmək əvəzinə şantaj edirik.
15. Biz elə bir cəmiyyətdə yaşayırıq ki, yeni film və ya klip çəkilişi üçün keçirilən seçim turlarına gedən qızlarımızı yarıçılpaq göndəririk, istedadı, yaradıcı təbiəti yoxdur, bəlkə başqa bacarığı ilə seçilər deyə.
16. Biz elə bir cəmiyyətdə yaşayırıq ki, cinsindən və yaşından asılı olmayaraq, xarici vətəndaş görəndə, üstəlik onun pullu olmasını biləndə, özümüzü ona sırımağa çalışırıq.