Rəşad Babalı

Əgər erməni olsaydın 

Ölkənin bir nömrəli vətənşivən, jek müdirlərinin qənimi, ölkədəki aqlaylı inkişafın hər addımını gözdən qaçırmayan
ANS-in bir suyu sevimli şəhər “mer”inə oxşayan jurnalisti Mirşahin Ağayev kəskin U dönüşü edib. Mayın 25-də “Ötən
həftə” proqramında Qarabağ ermənilərinə səsləniş edib. Türkiyəlilər demiş “ulusa səsləniş”. Normalda bunu dövlət,
hökumət başçısı etməlidi. Amma bizdə onların başı siyasi dustaq sayını artırmağa qarışdığı üçün bu missiya məcburən
teleseyidin üzərinə düşüb.

Özü demiş Qafqazın bir nömrəli “patriot” kanalında Qarabağ ermənilərinə gəlin bizə birləşin dedi. Bəli, bəli, düz
eşitdiniz. Baxmayın ki, ilin 364 günü etnik düşmənçiliyi körükləyən, saxta, merkantil maraqlara qulluq edən
vətənşivənliyi təbliğ edən telekanalizasiya necə oldu da birdən birə sülh çağırışları etdi? Bunu özlüyümdə çözə
bilməmişəm. Əslində baş yormağa da ehtiyac yoxdu. Elə də ciddi bir səbəb görmürəm. Yuxarıdan pultun başqa
düyməsini basıblar bu dəfə.

Teleseyid telesüjetində Qarabağ ermənilərini inandırmağa çalışırdı ki Azərbaycanın tərkibinə qayıtmağınız sizin
xeyrinədi. Əsas kimi də bir neçə rayon mərkəzinin (Qəbələ, Yevlax, Xaçmaz, Lənkəran və s) təmir olunmuş hissələrini
göstərdi. Dedi ki, baxın görün adicə əyalət şəhərimiz necə inkişaf edib. Vaxtilə Bakı və Gəncədən sonra 3-cü şəhər
olan Xankəndi indi vaxtilə küncdə bucaqda unudulmuş rayon mərkəzlərindən belə çox-çox geridə qalıb. Daşı tökün
ətəyinizdən, rəsmi Bakı Dağlıq Qarabağı da o şəhərlər kimi qısa zamanda abad eləsin.

İlk baxışda urapatriot kanal kimi tanınan ANS-də belə materialın getməsi yaxşı görsənə bilər. Yalançı müharibə
ritorikası yerinə ermənilərə sülhə hazır olduğumuzu göstərir filan. Amma o qədər “amma”lar var ki Teleseyidə nəinki
inanmağa mane olur, əksinə yumşaq desəm yalan danışdığını göstərir.

Ey özünü telekanalizasiyaların AS-ı sayan Mirşahin Ağayev, müvəqqəti də olsa özümüzü qoyun Qarabağ ermənilərinin
yerinə. Birdən qulağını çəkib “kış, kış” edərsən ha. Unutma ki, sən Yardımlının Perembel kəndində yox, Ağdərənin
Dranbom kəndin də Aşotun ailəsində də doğula bilərdin. Adın da Mirşahin yox, Karapet olardı. Bax empati qur və
təsəvvür et ki, sən o Karapetin yerindəsən və baxırsan Azərbaycana. Sənin sabunlu kanalının gözüylə yox ha,
gerçəkdən. Azərbaycan dilini bilirsən və xəbərləri izləyirsən. Karapet ancaq “alov qüllələri”ni görəcək? Bayraq
meydanında başlayıb Cavanşir körpüsündə bitən Bakının (elə Azərbaycanın) inkişaf simvolunu ancaq sənin kimilərin
gözünə görsənir. Aşot oğlu Karapet baxacaq ki, sən səhərdən axşama yeri gəldi gəlmədi etnik düşmənçiliyi
alovlandırırsan. Dilindən militarist ritorika əksik deyil. “Lazım”la qorxudursunuz. Ancaq Karapet sizin hədə
qorxularınızdan narahat deyil. Adı üstündə, boş hədə qorxu.

Karapet daha sonra baxır ki insanlar sifarişli hökmlərlər şərlənib içəri atılırlar. Öz özünə düşünür ki bu hökumət öz
xalqına qarşı belə amansızdısa düşmən bildiyi mən erməninin dərisini üzər. İnsanlar anayasada göstərilən hüquq və
azadlıqlarından istifadə etmək istədikdə o saat repressiv aparat işə düşür. Azad və ədalətli seçki, mətbuat, söz azadlığı,
iqtisadiyyat istəyənlər müxtəlif üsullarla şərlənir. İndi gör düşmən bildiyin bir millətin nümayəndəsinə necə davranarlar
(öz vətəndaşın olsa belə).

Karapet daha sonra baxacaq ki, ölkə iqtisadiyyatı monopoliya üzərində qurulub. Ölkəyə girən də, çıxan da təkəlcilərin
əlindədi. Belə olan halda Qarabağ ermənisi əkib-biçidyini, hazırladığını rahat çıxarda bilməyəcək axı. Arsax konyakını
hansısa boynuyoğun gömrük məmurunun bığının altından keçəndən sonra xaricə çıxarda biləcək. Karapet çaşıb
birdən özünə kiçik bir iş qurmaq istədi. O zaman görəcək ki, Fazil Məmmədovun xüsusi təyinatlılarının hücumuna
məruz qalıb. Ona başa salacaqlar ki gördüyü işə filan nazir baxır. Onunla fifti-fiftiyə razısansa işlə, razı döyülsənsə
get acından öl.

Sonra bir də gördü ki Drambomdakı evləri nazir oliqarxlar almağa başladı. Bütün meşələr, səfalı yerlər hasara alındı.
Kəlbəcərdəki İstisuya həsrət qoydular, Cıdır düzü ancaq manısların üzünə açıq olacaq. Hektarlarla meşə sahələri yerli
sakinlərin üzünə bağlı olacaq. İstirahət yerlərində turizm obyektləri qurulacaq. Karapet də uzaq başı o obyektlərə
mühavizəçi və ya ofisinat işləyəcək.

Daha sonra seçkilərdə (deputat, bələdiyyə) o yerlərlə heç bir əlaqəsi olmayan adamlar “seçiləcək”. Gəlib deyəcək ki
“siz səs versəniz də, verməsəniz də mən seçiləcəm” deyəcək.

Karabat baxacaq ki, kim birini söymək istəsə “erməni” deyir. İrəvanda erməni qızlarıyla oynayanlar, İrəvana səfər
edənlər vətən xaini sayılırlar. Özünü vətənpərvər göstərmək istəyən yeri gəldi gəlmədi “erməni ovu”na çıxır.
Müharibədə tuman altında gizlənənlər indi yumruq göstərir və s.

Teleseyid müəllim, sən karapetin yerində olsaydın birləşərdin Azərbaycana?

  Rəşad Babalı

• 1
• 2
• 3
• 4
• 5