İnsan meymundan əmələ gəlib? Başlıq cümləsində məntiqi vurğu sonuncu sözdədir, yəni "gəlib"də. Bu gün Sizinlə danışmaq istədiyim mövzu əslində tam olaraq bu deyil, onsuz da bizim qəbul edib etməməyimizdən asılı olmayaraq, elm insanın ali məməlilər sinifinin, primatlar dəstəsinin üzvü olduğunu sübut etmişdir və hələ ki, daha inandırıcı alternativi yoxdur. Ancaq bu məsələdə dindar qardaşlarımızın çox sevdiyi bir sual var: əgər insan meymundan əmələ gəlibsə, bəs indi niyə əmələ gəlmir? Bunun mübahisəsini etmək istəmirəm, ancaq məncə təkamül təliminə əsasən insan və indiki meymunlar eyni kökdən başlanğıc götürüb. Yəni insan meymundan əmələ gəlməyib, insan da, meymun da başqa, indi var olmayan eyni bir canlıdan əmələ gəlib. Bu şübhəli məsələ deyil. Kim deyə bilər ki, insan tam olaraq əmələ gəlib. Mənim bu gün üstündə durmaq istədiyim şey budur: insan meymundan, yaxud başqa bir canlıdan, lap götürək cansız torpaqdan əmələ gəlib qurtarıbmı? Tamdırmı indi insan? Mükəmməldir? Çoxları insanı mükəmməl adlandırır, bəzən onların arasında həkimlərə də rast gəlib, lap heyfslənirəm. Həkim olan bəndə, bütün günü insanın çatışmazlıqları ilə əlləşən, insanın mükəmməl olmamasından pul qazanan adam insanın mükəmməl olduğunu necə iddia edir?! İnsan mükəmməl deyil, insan mürəkkəbdir. Sadəcə hər bilmədiyimiz şeyi aliləşdirdiyimiz kimi, insan orqanizmini də aliləşdiririk. İnsan bu dünyada ən çox xəstəliyə məruz qalan canlıdırsa, hansı mükəmməllikdən söhbət gedə bilər? Buna sonra qayıdarıq. Bu yaxınlarda ağlıma bir fikir gəlib. İnsanın tam olaraq əmələ gəlib qurtarmadığına, təkamülün hələ də davam etdiyinə və təbii seçmənin gözümüzün qarşısında getdiyinə bir daha əmin oldum. Son vaxtlar hamı xəstəliklərin artdığından şikayət edir. 20 il bundan qabaq xərçəng xəstəliyi bu qədər deyildi. QİÇS getdikcə artır, leykoz, hepatitlər və s. Tibbin mübarizə aparmaqda aciz olduğu xəstəliklər getdikcə çoxalır. Bunu radiasiya, stress, qidalanma, sosyal şərait, informasiya bolluğu və s. ilə əlaqələndirirlər. Ancaq məncə bu məsələyə diqqətlə baxsaq, onu tanıya bilərik, o milyon illərdir ki, bizə tanışdır. Məncə bu qoca təbiət ananın seçməsi, yəni təbii seçmədir. Dəyişən iqlim, ətraf mühit, informasiya və s. hamısı xəstəliklərin artmasına, nəticədə daha çox ölümə səbəb olur. Bu xəstəliklərə məğlub olan insanlar yaşaya bilmir. Getdikcə xəstəliklərin yaşı azalır, daha cavan, daha az yaşlı insanlarda ölümcül xəstəliklərə rast gəlinir və nəticədə ölümcül xəstəliklərə məğlub olan insanlar nəsilartırma yaşına çatmamış ölürlər. Onların nəsli davam etmir. Eyni mühitdə, eyni ekoloji şəraitdə yaşayan digər insanlar həmin xəstəliklərə düçar olmur, hər hansı səbəbdən onun orqanizmi müəyyən amillərə qarşı daha dözümlüdür. O insanlar yaşayıb, nəsil arıtırıb çoxalırlar. Nəticədə təbii seçmə baş verir. Təbiət zaman keçdikcə stress, radiasiya, informasiya bolluğu və nəhayət bunların təsirindən əmələ gələn xəstəliklərə qarşı dözümlü fərdlər yaradır. Vaxt var idi (ibtidai) insanlar iki ayaq üstündə dik yeriməyi bacarmırdı, dörd ayaqla hərəkət edirdi. Digər heyvanlardan uzaqda yaşadığı dövrlərdə bu problem deyildi, ancaq çoxalıb hər yerə yayıldıqca vəhşi heyvanların hücumlarına daha çox məruz qaldılar. Nəticədə qalxa bilənlər, qaça bilənlər qalib gəldi və yaşadılar. Nəsil artıra bildilər və bizlər əmələ gəldik. Əlbəttə ki, mən çox bəsit bir misal göstərdim, bu min illər ərzində baş vermiş prosesdir. İndi vəhşi heyvanları vəhşi viruslar, mikroblar, informasiya, ekoloji amillər və s. əvəz edib. Və təbiət öz sonbeşiyini onlara qurban vermək istəmir. Zamanla indi problem olan xəstəliklərə düçar olmayan insanlar əmələ gələcək. Yəqin ki, o insanlar arasında da bizim sümüklərimizə baxıb bizdən əmələ gəldiklərini inkar edənlər də tapılacaq.

• 1
• 2
• 3
• 4
• 5