Utopiyada yenidəndağıtma siyasəti

Şəffaf seçkilər nəticəsində Aran müəllim Utopiyanın yeni prezidenti seçildi. Hakimiyyətə gələn kimi “ Yenidəndağıtma siyasəti ” adlı islahatlar proqramı hazırladı. Nazirlər kabinetinin yeni tərkibi müəyyən edildi. Bəşər tarixinin ən antidemokrat ziyalısı Platon baş nazir təyin olundu. Səhiyyə naziri vəzifəsi Markiz de Sada, sosial müdafiə nazirliyi isə Kamyuya həvalə edildi. Aran müəllim çox düşünsə də gənclik sirdaşı Hikmət Cavana vəzifə tapa bilmədi. Mədəniyyət naziri Bukovskinin məsləhətindən sonra Hikmət Cavan qocalar evinə müdir seçildi.
Ölkənin uzun illər ərzində qazandığı mədəni uğurları Bukovski bir gecədə dağıtdı. Hikmət Cavan qocalardan topladığı “şirinlik” nəticəsində oğluna “Prado” aldı. Dostoyevskiyə kazinolar, Beqbederə gecə barları həvalə olundu. Digər vəzifələrə də dünya şöhrətli yazarlar, ziyalılar təyin olundu. Yazmaqdan başqa heç bir yaxşı iş bacarmayan dünya dahiləri dövləti qısa zamanda darmadağın etdilər. Təkcə yazmaqdan başqa hər şey bacaran Aran müəllimlə, Hikmət Cavan ciddi siyasi uğurlar qazandılar.
Xəstəxanalarda yoxlama keçirən Markiz de Sad gördüyü hadisələrdən sarsıldı. Həkimlər xəstələrdən pul almadan yardım edirdlər. İnsan ömrünün dəyəri yüksəlmişdi. Sadist yazar etiraz etdi:
- Axmaq həkimlər, əzabla yaşamaq, qüssə içində ölmək xoşbəxtlikdir, insanları bu xoşbəxtlikdən məhrum etməyin, adınızı həci qoymusuz. Olmaz belə, heç sizdən gözləməzdim.
Kamyu yoxsul əhaliyə dedi ki, varlıq, heçlik, yaşam, ölüm hamsı cəfəngiyyatdır, açılın başımdan. İnsanlar ölür və xoşbəxt deyillər. Bu ölkədəsə insanlar ölmürlər, çünki ölü doğulan ölə bilməz.
Markiz de Sad baş həkim Muradxanovun qızına aşiq oldu. Qızın anasınının həcixanum olması De Sadı sevindirdi. Ancaq bu sevda baş tutmadı. Qız de Saddan daha sadist imiş.
Bukovski gördü ki, Hikmət Cavan sünnət toyunda şeir kitablarını paylayır. Həyatında kiçik toylara getməyən Bukovski toylara getməyə başladı. Hər sünnət toyunda 200 kitab payladı. Bax budur, Bukovskini məşhurlaşdıran səbəb. Ümumiyyətlə deyim ki, Bukovski milli mənəvi dəyərimizdir. Səbəbkar Aran müəllimdir.
Utopiyanın həşəratları, bitkiləri də Aran müəllimin siyasətini dəstəkləyir. Eşq olsun, Aran müəllimə. Gələn ay Aran müəllimin 730 yaşı olacaq. Nazirlər kabineti böyük səylə həmin mərasimə hazırlaşır. Mən Məşədi Kəbralayi Həci Qasum “Qızıl kələm” qəzetinin mənə tanıdığı fürsətdən istifadə edərək Aran müəllimi təbrik edirəm. Arzu edirəm ki, Allah- təala yaltaq adamların ömründən kəsib Aran müəllimin ömrünə calasın.
Nicat Həşimzadə

• 1
• 2
• 3
• 4
• 5