Səxavət Sahilin “İsanın qadını” romanından bir hissə

Peyğəmbərin dediklərindən həyəcanlanmışdım. Özümü dünyanın xilaskarı kimi görürdüm. İsa peyğəmbər hər şeyi dəqiqliklə deyirdi:

- Gedərsən Sumqayıt yolundakı təzə tikilən avtovağzala. Avtovağzalın arxa tərəfində təmir sexləri var. Sexlərin həyətində 3 dənə hündür şam ağacı var, qalanları balacadır. Ortadakı hündür şam ağacına söykən, üzün şama tərəf olsun. Qucaqla ağacı, şam səni hamilə edəcək, üfürdüyüm ruh şam ağacından keçib sənin bədəninə dolacaq. Şam ağacı müqəddəs ağacdır, dediklərimə yaxşı fikir ver. Ağaca söykənəndə gözlərini yum, məni yataqda təsvir elə, bir saat ağaca söykənib dayan. Çalış heç kim görməsin, qaranlıqda getsən yaxşıdır, gecələr ruhlar oyaq olur, dualar qəbul edilir. Dediklərimi yaddan çıxarma, paklan, təmizlən, yuyun get.

Səhər yuxudan qan-tər içində oyandım, adyalım, mələfəm suyun içindəydi. Durub xalatımı geyinmək istəyəndə polun üstündə qurumuş qan ləkərini gördüm. Ürəyim atlanmağa başladı, İsa peyğəbərin əlləri yadma düşdü. Bilmirdim nə edim, deyəsən qurban olduğum yuxuda yox, aşkarda gəlirdi. Tərli-tərli havaya çıxdım, 5-10 dəqiqə havada qalıb qayıdıb evə girdim. Əynimi dəyişib iş paıtarımı geyindim, pol əsgisini isladım qan ləkələrini sildim. Çay içməyə də iştahım olmadı, işə sarı yorğaladım. 

***

Şamın acıtəhər qoxusu Məhəbbətin gözlərini acışdıra-acışdıra özünə çəkirdi, gözləri böyümüşdü, hədəqsinə sığmırdı. Ağacı yarıadam, yarıağac kimi görürdü. Ağacın baş tərəfi adama cevrilirdi, göyə uzanan budaqlar adamlaşırdı, adam paltarı geyinirdi. Məhəbbətin gözlərinə balaca əmisi göründü. Yarıağac olan balaca əmi ona tərəf gəlmək istəyirdi, gələ bilmirdi, yenə həmənki kimi gözləri qızarmışdı. Sonra ağac əmisi oğluna cevrildi, əlində toy gecəsi bıçaqlandlğı qəmə tutmuşdu, ucundan da qan damırdı, yazıq-yazıq Məhəbbətə baxırdı... Ağac indi də Məhəbbətin ikinci ərinin bibisinə çevrildi, onu yola salırmış kimi budaq-qolunu yellədirdi. Axırda ağac Hidişə çevrildi, - Hidiş üzünü çevirib getmək istəyirdi...

• 1
• 2
• 3
• 4
• 5