Taleh Məmmədov

Orta statistik sentimental azərbaycanlılar

    Gündəmdə olan mövzular haqqında yazmağı sevmirəm. Zatən gündəm mövzuları elə şeydir ki, onun haqqında əli klaviatura tutan hər kəs yazır. Azərbaycan gündəmi isə elə şeydir ki, o hansısa yaxın xaricdə baş verən bir hadisə ilə anidən dəyişə bilər. Mayın 13-dən bu yana Erkin bəy Qədirlini müzakirə edirdik. Onun mənsub olduğu, yaratdığı hərəkatdan az qala qovulmağını türklər demiş dartışarkən gündəmin düz ortasına yenə Türkiyə oturdu. Türkiyədəki mədən qəzası bizim allah qoymasa aktivist və aktvistkalarımızı qəzəbləndirdi. Feysbuk və tvitterdə az qaldılar qonşu dövlətdə inqilab edələr.    

 Ömrümüzə-günümüzə Ərdoğanı gündəm etməklə oturdular. Ərdoğana daha nə etmədilər?! Asdılar kəsdilər, qabaqlarında otuzdurub uşaq kimi danladılar. Mədəndə görülməli olan texniki təhlükəsizlik tədbirləri barədə sayın başbakanı təlimatlandırdılar, arada əsəbləşib əllərinə keçəni kişinin başına vurdular. El arasında urvatsız etdilər. Ələxsus osmanlı türkcəsində yazan azərbaycanlılar görülməyə dəyərdi. Arada çəki atmaq üçün ən effektiv üsullardan biri orta statistik azərbaycanlının türkcə Ərdoğanı tənbeh edən sitatlarını oxumaqdır. Sınanmış vasitədir. Nə isə, qayıdaq gündəmə. Sentimental orta statistik azərbaycanlı feysbukda oturub qonşu ölkədə inqilab etməyi sevir. Ötən il də belə etdilər. Gəzi Parkı olaylarında bir neçə gədə-güdə gedib İstanbulda internet cafedə oturub "barrikadadayıq" deyə tvitlər atırdılar. Bu "Dığalar"ın arxivini, zaman tunelini eşələsəniz öz ölkələrindəki proseslərə heç vaxt reaksiya vermədiklərini görərdiniz. Əksinə, nə isə etmək istəyənləri də ələ salan, karikatur hazırlayan bu tiplər Türkiyədə kəsilən 3-5 ağac üçün barrikada qurmuşdular. Yaxşiki Ərdoğan möhkəm durdu, bu "kitaySiki Qavroş"lara aman vermədi. Yoxsa indi burda bunların forslarından dura bilməzdik. Mədən faciəsi yenə bu tiplərin ortalıqda atılıb-düşməsinə rəvac verdi. Öz ölkəsində baş verənlərə reaksiya verməyənlər bu faciəyə görə saçlarını yolmağa başladılar. Faciənin baş verməsinin səbəbkarını da tapmışdılar :R.C.Ərdoğan! Faciənin həcmi dəhşətli idi amma atalar demişkən : " anası qaldı, xalasının ürəyi getdi" ?!

• 1
• 2
• 3
• 4
• 5