Müşfiq Şükürlü

Anaravirus

 82 illiyinə

Çinlilər koronavirus deyilən bir şey yayıblar. İndi də deyirlər ki, bizim virusdan dünyada yoxdur. Ayy hayy! Ölmüşdü Xankişi. Onların qabağına elə virus çıxardarıq ki, qorxularından qaçıb Çin səddinin lap başına dırmaşarlar.

Sizə virus deyirəm e. Korona-morona zad yox. Elə virus ki, qısa müddətdə iki mindən artıq adama yoluxub. Özü də hər yoldan keçənə yoluxmur. Harda bir şair, yazıçı varsa, onun yaxasından yapışır. Qoca demir, cavan demir. Arvad demir, kişi demir. Uşaq demir, böyük demir. Əliqələmli birini  gördümü, çəkir öz tərəfinə. Adamları öz tərəfinə çəkmək üçün şirnikləndirici yeni üsullar tapır. Qocalara hər ay 300 manat, cavanlara da 200 manat pul verir. Kiminə ev, kiminə mükafat, kiminə fəxri ad verir. Belə virusdan kim inciyər?

Amma hər virus kimi bu virusun da paxıllığını çəkənlər var. Deyirlər, guya, bu virus istedadların qabağını alır, onları gözümçıxdıya salır. Tövbə, əstəğfürullah! Hamısı yalandır.

Bu virus pis virus olsaydı, heç onu italyanlar “Dantenin yubileyi”nə çağırıb Romanın, Milanın ən gözəl otellərində ona yer verərdilərmi? İndi italyanlar bizcə bilmirlər?

Yaxşı, deyək ki, italyanlar qanmazdırlar. Bəs, öz tülkülərimizə nə söz! Əgər bu virus pis virus olsaydı, türk qardaşlarımız onu öz otel otaqlarına dəvət edərdilərmi?

Yox e yox. Biz qədirbilməzik. Öz virusumuzun ümumtürk və ümumdünya konturlarından bixəbərik. Ona görə ermənilər başımıza bu oyunları açır.

Yaxşı, tutaq ki, indi qarmaqarışıq dövrdür. İt yiyəsini tanımır. Bəs sovet dövrünə nə söz! Sovet dövründə niyə bu virus SSSR-nin sərhədlərini aşıb bütün sosialist ölkələrinə yayılmışdı? Yoxsa polyakların, rumınların, çexlərin, slovakların, bolqarların bizim qədər ağlı yox idi? Vallah, biz nankoruq. Biz öz virusumuzun qədrini bilmirik. Deyirik ki, daha bizə lazım deyilsən, ay virus. Çıx get.

Guya, bu koronavirusdur nədir. Elə bir dəfə deməklə çıxıb getsin. Ayy hayy!

Bu virusun bir ucu Moskvada, bir ucu İstanbuldadır. Onun 82 yaşı var. 32 ildir vəzifədədir. Bunu bir günə-iki günə məhv edə bilərsən?! Bir yox, istəyirsən min dənə maska tax. Nə xeyri!

O səninçün koronavirus zad deyil. O, Anaravirusdur. Anaravirus!

• 1
• 2
• 3
• 4
• 5