SƏNİN YARANIŞ SƏBƏBİN

250 milyon spermadan yalnız sən yumurtalığa çatanda dünyanın ən şanslı, həm də ən xoşbəxt insanı oldun doğulan hər kəs kimi. Həm də milyonlarla qardaşının qatilinə çevrildin. Onda sən nə ət, nə də sümük idin və tanrı buna görə sənə cəza kəsməmişdi. O, sadəcə sənə gedəcəyin yolu başa salmışdı. Həyatda durduğun yerdəcə qatil ola biləcəyini anlatmışdı. Quruluş və yaranış səbəbin… Sənin əvvəlcədən çizilmiş yolun… Gecə klublarında içki içərkən, futbol stadionlarında səs-küy salarkən duya bilmədiyin, qocalığın sakitliyində eşitdiyin tanrının səsi – yaranış səbəbin…
Bu elə bir duyğu ki, sənə İsanın ölümündə niyə günahkar olduğunu anladacaq xaçpərəst olmasan belə. Atdığın hər addımda xilas edə bilmədiyin insanlara görə rəzil hiss edəcəksən özünü. Ölümdən daha böyük günah, yaşamdan daha böyük xoşbəxtlik, ziddiyətlərinin toqquşduğu yer, səni tanrıya aparacaq səssislikdən gələn o səs… Dəli olduğunu sanacaqsan bir anlıq. Bax onda içindəki heyvanlıq hissi dirçələcək. Həyatın kainatdan düşən açarı sənə görünməyənləri açanda necə aciz və günahkar olduğunu anlayacaqsan, bütün dünya kiçik gələcək sənə… Bax o zaman bu kiçik dünyanın sahibi olmağa çalışacaqsan. Yenidən həyata ilk gəlişində olduğu kimi 244 milyon 999 min 999 insanı qətl etməyənə qədər sakitləşməyəcəksən. Növbə sənin özünə çatanda, fərqində olacaqsan ki, indi də hansısa yeni doğulan körpə ruhunu alır səndən. Qorxun yenə sənə günahkar olduğunu pıçıldayacaq. Milyonları ölümdən xilas etmədiyinə görə günahkar olan bəndə, tanrının aciz yaratdığı bəndə, gözü doymayan, fəlsəfənin son meyvəsinə aldanan bəndə… Sən acizsən, sən qorxaqsan o zaman. Çarəsiz ölümə, öldürməyə, öldürülməyə məhkum insan… Həyatın sirrini açdığını sandığın anda tələyə düşən, özünü müqəddəs sayan çirkin varlıq. Sənin ən xoşbəxt tərəfin belə bədbəxtliyindir. Çünki, bu sənin yaranış səbəbindir.

• 1
• 2
• 3
• 4
• 5