Vüqar Haqverdiyev

İntihara səbəb günah

Rita xanım uzun müddət idi qadın məsləhətxanasında mama ginekoloq işləyirdi. Tanınmış doktor idi. Qadınlara həkim məsləhəti verməkdən əlavə, lazım gəldikdə abort və bakirəliyin “bərpa” edilməsi əməliyyatlarını da həyata keçirirdi. Belə operasiyalar etmək günah sayılsa da, ginekoloq xanım qətiyyən özünü günahkar saymırdı, əksinə o, çox böyük savab iş gördüyünü düşünürdü. Onun fikrincə, arzuolunmaz hamiləlikdən dünyaya uşaq gətirmək özü elə arzu olunan deyil. Belə uşaqlar daima ailədə təzyiqlərə məruz qalır, söyülür, döyülür, incidilir, sonda da sırtıq, yaramaz, tərbiyəsizin birinə çevrilir. Nikahdan qabaq bakirəliyi pozulmuş qızların aqibəti isə daha pis olur. İşin üstü açılanda belə qızlar öz günahlarını intiharla yuyurlar, ya da yaxınları tərəfindən öldürülürlər, ən yaxşı halda isə ailəsi ilə birlikdə rüsvay olurlar.

Ginekoloq xanım bir gündən bir işləyirdi. Yaşı əllini keçsə də, ona qırxdan artıq yaş vermək olmazdı. Çox təravətli və gözəgəlimli idi. Kosmetikadan bolluca istifadə edirdi. Üz-gözü qalın yağlı makiyajın parıltısından alışıb-yanırdı. Saçlarını da həmişə gənc qızlar kimi zərif qızılı rənglə boyayırdı.

Rita xanım savadlı həkim olduğu üçün pasiyent sarıdan korluq çəkmirdi. Yanına həm tanış-biliş tərəfindən göndərilən xanımlar, həm də naməlum tanımadığı qız və gəlinlər gəlirdi. Bu gün də elə tanımadığı  22-23 yaşlı bir qız qəbuluna gəlmişdi. Qarasaç, incə bədənli gözəl qız idi. Utana-utana həkimə dərdini danışırdı. Qızın dediyinə görə adı Jalə idi. Universitetdə oxuyurdu, axırıncı kurs tələbəsi idi. Altı-yeddi aya təhsilini başa vuran kimi, onu dərhal ərə verəcəkdilər.

Rita xanım məsələnin nə yerdə olduğunu o saat başa düşdü. Qıza artıq suallar vermədən bakirəliyin bərpası ilə bağlı məlumat verdi. İzah verdi ki, bunun iki yolu var. Birincisi müvəqqəti olur, toydan 3-4 gün əvvəl, ikincisi isə uzun müddətə hesablanır, toydan  6-9 ay əvvəl həyata keçirilir və bu birincidən baha olsa da, daha effektlidir.

Özünü Jalə kimi təqdim edən qız ikincisi ilə razılaşdı. Ginekoloq qızı müayinə edəndən sonra, operasiya üçün gələn həftəyə vaxt təyin etdi. Müayinədən sonra, qız əynini geyindi, sakitcə həkimin haqqının yarısını verib deyilən vaxta burada olacağını bildirdi. Rita pasiyenti yola salıb yır-yığış edib evə getməyə hazırlaşdı. Birdən gözü yerdə balaca ağappaq əl dəsmalına sataşdı.

-      Yəqin o qızdan düşüb. - Əyilib götürdü. Tərtəmiz dəsmaldan gözəl ətir iyi gəlirdi. Burnuna yaxınlaşdırıb iylədi. Fikrə daldı: - Görəsən bu insanlar niyə özləri belə təmiz deyillər? Bunu gəzdirən qız, niyə özü başdan-ayağa günah içindədir. Gözəl, qəşəng qızdır, artıq indidən ərini aldatmaq yolunu tutub. Yazıq bunu alanın gününə. Heç adı Jalə də deyil, universitetdə də oxumur, yalan deyir hamısını, o qədər belə pozğun afriskalar gəlib ki, bura...Nəysə, lənət şeytana! – Birdən yadına düşdü ki, öz oğlu da evlənməyə qız axtarır. - Allah eləməsin ona beləsi qismət olsun. Yox-yox toydan qabaq özüm qızı mütləq yoxlayacam...

Rita işdən çıxıb evə yollandı. Evə gələndə eşitdi ki, köhnə rəfiqəsi Tünzalə zəng edibmiş. Çox sevindi, öz-özünə dedi:  - Görəsən telefonumu haradan tapıb. Təzə evə köçəndən onunla heç əlaqə saxlamamışmam. Mobil nömrəsi də telefonumdan necə olubsa silinib. Eybi yox, səhər gedib iş yerində görüşərəm. Onsuzda sabah boşam  

Səhər dediyi kimi də etdi. Tünzalənin kabineti dördüncü mərtəbədə yerləşirdi. İdarədə şöbə müdiri idi. Köhnə rəfiqələr görüşüb öpüşdülər. Oturub dərdləşdilər, ailələrindən, uşaqlarından danışdılar. Rita dedi ki, oğlunun evlənmək vaxtı keçsə də, hələ də ondan bir tərpəniş yoxdur.

-      Ay qız, mənim oğlum, səninkindən fərasətli çıxıb ki. Bu yaxınlarda nişanı olacaq. - Tünzalə gülə-gülə dedi.

-      Doğurdan? Nə yaxşı, Allah xoşbəxt eləsin. Qız kimlərdəndir.

-      Bir qəşəng, gözəl, tərbiyəli qızdır ki, gəl görəsən. Öz işçimdir.

-      Nə danışırsan? Bu lap əla oldu ki...Yəqin yaxşı tanıyırsan?!

-      Bəs nə, ay qız, mən oğluma heç tanımadığım qız alaram. İndi zəmanə pisdir, təmiz qız tapmaq asan iş deyil.

-      Düz deyirsən, ay Tünzalə, sən bilsən ki, mənim yanıma necə qızlar gəlir, nələr xahiş edirlər, dəli olarsan.

Birdən otağın qapısı döyüldü və azacıq aralandı.

-      Samirə, gəl qızım, gəl...Köhnə rəfiqəm də burdadır...Rita bax, bayaqdan sənə təriflədiyim qız gəlir. – deyə Tünzalə əlini qapıya sarı uzatdı.

-      Tünzalə xanım, bu sənədləri Azər müəllim göndərib, – əlində içi sənəd dolu qovluq olan qarasaçlı incə bir qız içəri girdi. – Tapşırdı ki, bunları təcili Sizə çat...çat... – Rita xanımın gözlərinə gözü sataşanda qızın sözü ağzında yarımçıq qaldı. Rəngi-ruhu qaçdı. Əlindəki qovluq sürüşüb düşdü, içindəki sənədlər yerə səpələndi.

Samirə, qızım, sənə nə oldu, Rita kömək elə. - Tünzalə həyəcanla yerindən atılıb qızın üstünə qaçdı. İki əli ilə tutub yıxılmağa qoymadı. Güclə stula oturdurdu.

Rita isə donub qalmışdı. Dünən qəbulunda olan, özünü Jalə kimi təqdim edən qızı burda görməyi onu şoka salmışdı. Ancaq tez özünü ələ alıb köməyə tələsdi. Stolun üstündəki su qabını götürüb qızın üzünə su çilədi, yaxasını-başını açdı, qovluğu götürüb üzünü yelpiklədi.

Qız azacıq özünə gəldi: - Tünzalə xanım, üzr istəyirəm, bağışlayın, heç bilmirəm mənə nə oldu, sizi də narahat etdim, icazə verin gedim, özümü səliqəyə salım.

-      Samirə qızım, nə yaxşı ayıldın. Allahın bizə yazığı gəldi. –Tünzalə sevinclə dedi. – Qızım, heç narahat olma, Rita xanım da həkimdir, yaxşı ki burda oldu, yoxsa əldən getmişdin.

-      Yox, yox, siz, narahat olmayın...Mən beş dəqiqəyə gəlirəm, - bunu deyib qız cəld yerindən qalxıb otaqdan çıxdı. Özünü birtəhər qonşu boş otağa salıb qapını içəridən bağladı.

Tünzalə ilə Rita qızın dalınca çıxdılar. Qız girən otağın qapısını itələdilər açılmadı.

-      Aman Allah, bu qıza nə oldu birdən-birə? - Tünzalənin həyəcandan dil-dodağı əsirdi – Rita, bu nə işdi?

- Nə bilim vallah, mən heçnə anlamıram, – Rita çiyinlərini çəkərək özünü bilməməzliyə vurdu.

Birdən otaqdan pəncərə açılmasının, dalınca isə çöldən tappıltı səsi gəldi.

-      Bıy, başıma xeyir, bu nə səs idi, ay qız? – Tünzalə qorxu içində başını tutub öz otağının pəncərəsinə sarı qaçdı.

Bu zaman həyətdən dəhşətli qışqırtı səsi qopdu: - Ay aman, kömək edin, kömək edin, Samirə özünü pəncərədən atdı...

• 1
• 2
• 3
• 4
• 5