Hərənin öz muzdlu ziyalısı Gündəm

Hərənin öz muzdlu ziyalısı

Şəmşad ağa

Muzdlu tərəfdaşlar

Məşhur ingilis yazıçısı Somerset Moemin "Muzdlu tərəfdaşlar" hekayəsini oxuyanlar bilir, oxumayanlara da deyim ki, hekayə "Zero" nəşriyyatının "Cib kitabı" seriyasından 4-cü nəşrdir və hazırda satışda var. Qiyməti isə çox da baha deyil: 2.5 manat.

Sözümün canı bu deyil...

Əsərin qəhrəmanı üzgüçü Stelladır. "Bir tikə çörək"dən ötrü özünü 20 metr hündürlükdən 2 metr dərinliyi olan alovlu suya, bir az obrazlı desək, oda atan zavallı bir qız.

Onun pul qazanmaq üçün başqa yolu yoxdur. Elə əri Kotmanın da...

Hadisələri Azərbaycana dartıb gətirmək üçün kəndirə-zada ehtiyac yoxdur. Belə bəşəri mövzular öz təbii axarı ilə sərhədləri asanlıqla aşır. Azərbaycan kimi ölkələrdə cəmiyyətinin "bozluğu" və "boşluğu" belə mövzuları özünə çəkməkdə daha həssasdır.

Bu cür cəmiyyətlər heç bir ali dəyərə söykənmir. Bu, onlara lazım da deyil.

"Lazım"a ümid bəsləyən və illərlə onun yolunu gözləyən cəmiyyətdə hansı ali dəyərdən söhbət gedə bilər ki?.. Belə cəmiyyətlərdə bar mühiti, çayxana əxlaqı hökm edər, bu düşüncə hakimi-mütləqə çevrilər. Mental dəyərlər isə yalnız "mənə olar, başqasına yox..." kimi mənasız "alilik" statuna malik olar. Bu qədər bəsit...

Stella ikinci dəfə suya tullanmağın nə qədər dəhşətli olacağını duyur, bilir ki, bu, ölüm deməkdir. Kotman da əlacsızlıqdan onu sevə-sevə ölümə göndərir. Bu səhnənin iştirakçıları isə dünyanın faniliyini dərk etməyənlərdir, onlar üçün bu gün var, sabah yox... Və içərilərində bundan həzz alanlar, Stellanın dəhşətli ölümünü gözləri ilə görmək arzusunu gizlətməyənlər də az deyil.

Azərbaycan da belə bir ölkədir: hərənin özünə görə adamı, dayısı, xalası var və onlar toxunulmazdı... çünki sahiblərinin qoluzorlusu, qoçu dəstəsi, dostu-düşməni, ziyalısı, şairi, yazıçısı, jurnalisti... (siyahını uzatmaq da olar) var. Bəli, bəli, hərəsinin özünə görə...

Onlar bu dəstələrdən necə lazımdır istifadə edir, özlərinə süni "muzdlu tərəfdaşlar" düzəldir və kimə gəldi qısqırdırlar. Verdikləri "muzd"un necə böyük gücə sahib olduğundan həzz alırlar, lovğalanırlar, hətta onların faciəsindən belə kayf tuturlar...

Bura yekəqarın məmurların, bığıburma varlıların, mütrüblərin, əməlsiz "hacı"ların, Dubaya gedən "bacılar"ın məmləkətidir. Burada da stellalar, kotmanlar var, amma onlar hər gün ölürlər... Stella ikinci dəfə tullanmaqdan qorxursa, onlar yüz dəfə tullanırlar, erkəyi də, dişisi də...

Fərq ondadır ki, Stella bir dəfə öldü, hələ suya tullanmamış. Onlar isə hər dəfə palçığa girir, ölürlər...

Fərq ondadır ki, Stella yaşamaq üçün öldü, onlar isə ölmək üçün yaşayırlar..

Qiymət 3.5/5 (70%) (2 səs)

Digər xəbərlər

Bakı - üstüaçıq yas palatkasına bənzəyir

Diş fırçalarının xatirəsi

Kitab üçün düzgün ad seçimi

Ceyhun Mirzəli. Kino bizə nə deyir Umberto D. Esse

Həmid Piriyev. Pyes

Şərhlər