MİKROBUN MƏKTUBU

Salam, əzizim Eşerixia  Koli qızı.(bağırsaq çöpü)

Sənin son məktubunu aldım, harda ki, mənə çoxlu-çoxlu üfunətli sevgilər və sayqılar göndərmişdin. Çox sağ ol, çox razıyam. Mən sənin vəziyyətini çox gözəl anlayıram və bilirəm ki, sənin yerin lap cəhənnəmin özüdür ki, var. Düzdür, heç mənimki də cənnətməkan deyil. Mənim bu axmaq sahibim daim dərman qəbul edir, iynə vurdurur, həkimə gedir ki, məni öldürsün. Amma mən ondan əl çəkmirəm, sevirəm onu və daim də sevəcəm.

Mənim adımdan sizin bütün Escherichia cinsinə atəşin salamlar. Mədə-bağırsaq traktının disfunksiyalarında danılmaz rolu olan bütün bağırsaq çöplərinin alnından və çəp gözlərindən ehtiraslı dodaqlarınla öpərsən, mənim və ailəmin adından. Biz sizləri çox sevirik, bilirsən. Siz aşağıları dağıdırsız, biz yuxarıları.

Səndən digər patogen qardaşlarımızın taleyini də soruşmaq istərdim. Onlar sənin qonşuluğunda, aşağı məhəllələrdə yaşayırlar.

Qoy onların insan orqanizminə keçdiyi yollar – peroral və perkutan (ağız və dəri) daim açıq olsun. Onların bəxtinə çirkli-kirli, zibillikdə eşələnən insanlar düşsün həmişə.

Trematodlar (sorucular) ailəsində təzə nə dəyişiklik var? Qaraciyər sorucusu sormağa sağlam qaraciyər tapdımı? Onun taleyi məni çox narahat edir. Belə getsə, işsizlikdən onun sormacları quruyub töküləcək. Şistosomanın işləri necə gedir? Sormağa qan tapdı, ya yenə də acından günortalar durur? Çox avara tüfeyli ünsürlərdir bu qansorucular. Ətrafda bu qədər yağlıpeysər canlar var, amma bu qurdlar yenə də karlı bir klient/şikar tapıb karyera qura bilmirlər ki, özlərini doyursunlar. Məəttələm vallah...

Bizim böyük qardaşlarımızı – lentşəkilli qurdları soruşmasam, ayıb olar, məncə. Öküz soliteri neynir, qadan alım? Əsas sahibi olan insanı tapdı ya yenə yapışıb qalıb aralıq sahibdə - qaramalın bədənində? O gün bir pis yuxu görmüşəm. Görmüşəm ki, bir nəfər onun quyruğundan tutub çıxarıb, qoyub taxtanın üzərinə və başlayıb bıçaqla doğramağa. Allah bizləri o gündən saxlasın. Dəhşətdən az qaldı elə yuxudaca ürəyim partlasın. Bizlərə qarşı hərtərəfli diskriminativ aktlar keçirilməsinə baxmayaraq, müxtəlif detoks metodlarının tətbiqinə rəğmən biz varıq və hər zaman da var olacağıq! Biz hər şeyə dözürük və öz mentalitetimizi qoruyub saxlayırıq.  Amma bir şeyi də qeyd etməliyəm ki, mənim səbr kasam artıq dolub daşmaq üzrədir.

Ümumiyyətlə, düşünürəm, qarşıdan gələn ümumorqanizm helmintlər və parazitlər qurultayında bu məsələ mütləq gündəmə çıxarılmalı və ərazi bütövlüyünü qorumaq üçün müəyyən tədbirlər görülməlidir. Hətta ümumorqanizm təntənəli küçə yürüşləri də keçirdə bilərik. Qoy Sahib bizim həmrəyliyimizi görsün və qələt eləyib bizim işlərimizə burnunu soxmasın, xoşbəxtliyimizə pəl qatmasın. Mikroskopik mikrobları qabağa salarıq, onların kortejinin arxasınca isə siz qurdlar sürünərsiz. Düşünürəm, çox fövqəladə bir şey olacaq və bu akt Parazitlər dünyasında bir hadisəyə çevriləcək, canım, ay Eşerixia.

Donuz soliteri Teniya bacıya və Exinokokk qardaşa da mənim salamlarımı yetirərsən. Exinokokkun uğurlarından xəbərim var. Bu yaxınlarda birisinin ciyərini yeyib-dağıdıb, onu cərrah stoluna göndərməyə müvəffəq olub axır ki. Əhsən! O, bu həyatda öz missiyasını çox gözəl yerinə yetirir. Hamımız ondan ibrət götürməliyik.

İbrət demişkən, mənim əziz bacım, məni sahibim hər cür sıxır, basır, əzışdirir. Mənim bəxtim onda gətirmədi ki, mən Askarida doğulmadım. Lap onun o eybəcər, əyrimçə erkək fərdi olmağa da razı idim. Ya heç olmasa Trixosefal....., ya Anqilostoma olardım, 12-barmaq bağırsaqda keflə yaşayardım özümçün. Ümumiyyətlə, sizin, bağırsaqda yaşayanların elə lap əvvəldən bəxti ayaq üstədir. Gül kimi məkanda, ekskrementlərin arasında gününüzü vurursuz başa. Sizin çox işıqlı karmanız var. Düzdür, hərdən cızığınızdan çıxırsız, xəstəni elə hala salırsız ki, o məcbur olur sizinlə mübarizə aparsın və sizi məhv etsin. Dərmanlar, imalələr, pəhriz və s. Sizə açıq müharıbə elan olunur. Amma siz özünüz günahkarsız. Götürək elə o həyasız Askarıdı. O cür qəliz miqrasiya ilə adamı....tfu, qurdu, əlbəttə ki, öldürərlər. Axı ona kim deyirdi ki, bağırsaqdan venaya, qaraciyərə, ürəyə, ağciyərə və nəhayət, qida borusuna  düşsün. Bağırsaqdan ağıza qədər qalxmaq üçün adamda.....tfu, qurdda nə qədər və nə boyda cəsarət olsun gərək. Hələ onun ağciyər alveollarını vəhşicəsinə deşməsini demirəm... Belə qurdu dar ayağına çəkməyəsən, neyləyəsən?!....

O gün qəzetdə sənin uzaq qohumun Filyariya haqda oxumuşam. Ona da əhsən! Oz işinin gözəl bilicisidir. Hindistanda bir nəfərdə fil xəstəliyi əmələ gətirib. Xəstənin ayağı böyüyüb, yekəlib, formasını o qədər itirib ki, həqiqətən fil ayağını xatırladıb. Hindistan kinematoqrafçıları belə nadir məsələni diqqətdən kənar buraxmayıb, o şəxs haqda film çəkiblər. Filyarita ilə doğrudan da fəxr etməyə dəyər. Ona deyərsən mənim adımdan: “Sükanı belə saxla!”

Hə, az qala unutmuşdum. Ektoparazitlər.... Mən, bizim digər qansoran qohumlarımızla, əziz və çox dəyərli bitlərlə və onların həyat fəaliyyəti ilə daim maraqlanıram. Onların xortumuna qurban olum. Yeri gəlmişkən, baş bitinin 55 il onunla iş birliyi yapan sahibi aclıqdan və səfalətdən dünyasını dəyişib. İndi yazıq bit qalıb avara-sərgərdan. Təzə baş axtarır. Əgər sənin kirli-çirkli tanış-tunuşun varsa, de, yerini nişan verək, hoppansın başına, yaşasın özüyçün. Bir bitin ömrü cəmi-cümlətanı 38 gündür, bilirsən. Artıq vaxt bitmək üzrədir. Çirkli baş tapılmasa, bit oğul-uşaq sahibi olmayacaq, nəsli kəsiləcək. Olmaz belə....onda səpgili yatalağı kim keçirər?...

Canim Eşerixia, əgər yaninda içməyə bir şey varsa, süz, badələrimizi qaldiraq bir vaxtlar Kiçik Asiyada taun yaymış birələrin və tif yaradan gənələrin sağlığına!

Uğurlarımızdan və dost cəbhədən danışarkən, düşmənlərimizi də unutmaq  olmaz. Müqəddəs  Parazitlər ailəsinin adına qara yaxanları. Bəli, bəli, zəliləri nəzərdə tuturam. Əlbəttə, onların da arasında parazitlər var. Amma tibb zəlisi deyilən əbləh soxub papağımızı yerə. Deyirlər, insanlara kömək edir, onları bir çox mərəzlərdən qurtarir..... Hətta onun şərəfinə hirudoterapiya deyilən elm sahəsi də yaranıb. Aman, aman, belələrini görəndə mənim parazitlik potensiyam tam sönür.

Belə, belə işlər, əzizim. Mənim halımı sormaq istəyirsənsə, mən babatam......babatdan bir az aşağı...... daha doğrusu, lap aşağı. Mənim meninqit arzularım yoxa çıxmaq üzrədir. Sənə məlumdur ki, mən hava-damla yolu ilə ötürülürəm və ən ağır hallarda beyin infeksiyası – ensefalit törədirəm. Baş beyin iltihabına, həmçinin ağır böyrək çatışmamazlığına səbəb ola bilirəm. Hər şey yaxşı idi, dolanırdım özümçün. Günlərin bir günü bizim bu axmaq Sahibin başına düşür ki, müalicə olunmaq lazımdır. Qızdırma onu əldən salanda (41-ə qədər qalxmışdı), intoksikasiya əlamətləri – baş ağrısı, ümumi zəiflik, əzələ ağrıları və ağızda quruluq başlayanda qərara alır ki, həkimə müracıət etsin. Mənsə artıq onun psixikasını pozmağa başlamışdım, işlərim yaxşı gedirdi. Nə isə.... Həkim də (onların nəsli niyə kəsilmir görəsən?!) nə yazır, nə yazmırsa, mənim günüm qara olur. İndi mənim sahibim çox aktiv surətdə iynələnir. Yəqin ki, antibiotikdir. Hətta damarına da nəsə vururlar. Mənə bu dava-dərman çox pis təsir göstərir, dostum. İndi mənim epileptik tutmalarım başlayıb, qıcolmalar məni əldən salıb. Belə də qəddarlıq olar?! O boyda beyni var Sahibimin. Yəni mənə orda bir qırıq yer tapılmadı ki, mən də öz dövranımı sürüm? Axı bu insanlar niyə başa düşmürlər ki, onlar kimi biz də yaşamaq istəyirik?...... O öz arealında  yaşayır, mən də özümkündə. Məni xəlq eliyəndə soruşmayıblar axı, sən patogen mikrob olmaq istəyirsən, ya  daha ali varlıq. Bir də ki, insanlar arasında guya parazitlər yoxdur..... Elələri var ki, biz onlarin əlinə heç su tökməyə layiq deyilik. Onlar parazitlikdə və qan sormaqda bizdən çox-çox irəli gediblər, dostum. Heç gör onları öldürən ya imalənin ağzına qoyub, təzyiqlə çölə tullayan var?!  Eh, mənhus ikili standartlar..., biz balacalar onlardan çox əziyyət çəkirik...

Əzizim, Eşerixia, sonda sənə öz patogen arzularımı bildirmək istəyirəm. Mikroürəyimin ən dərin qatlarından gələn ən saf, ülvi, makro arzular... Canım mənim, qoy sizin o üfunət dünyanız heç vaxt süquta uğramasın. Parazitlər krallığı yeni-yeni sürfələrlə və yimurtalarla dolu olsun həmişə. Sormaclarınız, qarmaqlarınız, xortumlarınız güclü, qarnınız dolu olsun. Yeməyə həmişə bir qırıq qida qalığı tapasınız. Yolunuzun üstünə öz canının qədrini bilməyən insanlar çıxsın həmişə, virulentliyiniz yüksək olsun. Sizi məhv etmək üçün dərman yazan həkimin barmaqları qırılsın, qələmi sınsın. Dünya durduqca yaşayasız!

Hip-hip ura!

Bacılığın:       dünyadan bezar  Meninqokokk.

• 1
• 2
• 3
• 4
• 5