Siz Samiri tanıyırsınızmı? Ədəbi mühit

Siz Samiri tanıyırsınızmı?

İzolda Ağayeva

Samir

Onun kitabını ilk dəfə Aynur Zərintacın əlində görmüşdüm. Maraqlandım, kitabı Aynurdan alıb, oxudum. Sonra “Facebook”da dost olduq. Daha sonra uşaqlarla evlərinə getdik. Müsahibə aldıq ondan. Romanını oxuyan hamı kimi, mən də çox bəyəndim. Ona romanla bağlı çoxlu suallar verdik uşaqlarla. Cavablarından heyrətə gəlirdik, zövq alırdıq. İnsan nə qədər əzmkar ola bilər? Onun kimi məhdud şərtlər altında olan biri necə bu qədər məlumatlı ola bilər deyə təəccübləndik də. Bir-iki kitab yazıb, başımıza vuran, sonra da “yazmağa həvəsim yoxdur” “mən bir az tənbələm” filan deyə, palaz-palaz müsahibələr verən  “yazarlarımızda” Samirin əzminin bircə faizi ola kaş ki. Təsəvvür edin,  Samir ilk romanı “Hədəfdəki insan”ı bircə barmağı ilə bir ilə yazmışdı. Elə bunun özü belə, bu insan haqda hər şeyi demirmi? Doğrudan da, Samir öz həyat tərzi ilə sübut edir ki, fiziki məhdudiyyət heç vaxt insan üçün maneə ola bilməz.

Artıq “Alatoran” yayınlarında Samirin ikinci kitabı - “Mənim hədəfim” də çapdan çıxıb. Samirin ilk kitabını zövqlə oxuyan dostlar bu kitabla da tanış olsalar, çox şey qazana bilərlər. Bununla həm Samirə dəstək ola, həm də fiziki məhdudiyyətli insanların yaşadıqları çətinliklərlərdən, onların problemlərindən və hüquqlarlarından xəbər tuta bilərlər. Samirin hər iki kitabı və məqalələri həm də fiziki məhdudiyyətli insanların içində olan tükənməz istedadlara işıq salır.

Samirlə söhbətimiz zamanı onun bir fikri bizi çox təsirləndirmişdi: “Evdən çıxmaq imkanım məhdud olsa da, bütün gün kitablar oxuyuram. İnternetdən araşdırmalar edirəm. Dünya görüşü baxımından insanlarla aramızda uçurum yaranmasını istəmirəm”.

Görəsən, bu uçurumun nə olduğunu dərk edən neçə nəfərik biz?

Samir həm də mənim üçün çox əziz dostdur. Ən çətin vaxtlarımda Samir ya bir telefon zəngi, ya da bir mesajı ilə məni sevindirib həmişə.

Çox uzatmayım, bu gün Samirin doğum günüdür. Samir haqda çox uzun danışa bilərəm. Amma bircə cümlə ilə ifadə etsəm, deyə bilərəm ki, Samir çox əzmkar, fədakar insan,  sadiq dostdur. Doğum günün mübarək, əzizim!

Tanrı səni və ailəni, o balaca balanı qorusun! 

Qiymət 5/5 (100%) (2 səs)

Digər xəbərlər

Şəhla Nihan. O YOL. esse

Guntay Gencalp. Bir roman üzərinə düşüncələr (Nəcib Məhvuz, "Dilənçi")

Ramiz Atabəy.VƏ QIYIQ GÖZLÜ BİR QADIN...

POLİNA BARSKOVA. ŞAİR ÖLDÜ

Rəhim ƏLİYEV. Xoruzun oğlu. Hekayə

Şərhlər