Son zamanlar Azərbaycanda inkişaf edən “elm”lərdən biri də konspirologiyadı. Şübhə nəzəriyyəsi də deyilir. Türkcə “komplo teorisi” kimi tərcümə edilir. Ümumilikdə götürəndə konspirologiya sui-qəsd nəzəriyyəsi kimi tərcümə edilir. Daha sadə dilə çevirsək gizli siyasət.

Bizdə bu daha çox masonlar, iluminati kimi təşkilatların fəaliyyətinə maraqda özünü göstərir. Konspiroloqlar tarixi, siyasi hadisənin üzdə görünən səbəbləriylə nəinki kifayətlənirlər, əksinə bunu aldadıcı hesab edirlər. Konspiroloqların ana teması odur ki üzdə görünənlər həmişə yanıldıcıdı. Məlum qüvvələr insanların onların əməllərindən xəbər tutmaması üçün real olayları pərdələyirlər.

Azərbaycanda nəşr olunan elmi kütləvi ədəbiyyatın arasında gizli cəmiyyətlərə həsr olunan kitabların çoxluğu təsadüfi deyil. Xarici dillərdən tərcümə edilmiş bu cür kitabları oxumuş hazırlıqsız oxucu ciddi mənada depresiyaya düşür. Oxuduqlarından bu qənaətə gəlir ki, pahooooo, dünya göründüyü kimi deyilmiş. Əslində dünyanı dövlətlər, beynəlxalq təşkilatlar yox, məhz bu gizli qurumlar idarə edirmiş. İlk baxışdan cəmiyyətdə elə də yeri olmayan bu şəxslər əslində böyük təsir rıçaqlarına sahibdilər. Hökumətləri devirib başqasını təyin edirlər, əllərində böyük maliyyə resurları var, müharibələr törədirlər və s bu kimi geniş imkanları var.

Ədəbiyyat, tarix, psixologiya, sosiologiya elmlərindən xəbərsiz insanların bu kitablarda yazılanları olduğu kimi qəbul etməsi təbiidi. Orta məktəbdə və universitetlərdə öyrədilən elmlər cəlbedici deyil. Sıxıcı terminlərlə bol kitablar onlara ne verəcək ki deyə düşünürlər. Amma konspiroloji kitablar tam da bu “aclığ”ı dolurur. Onlar düşünürlər ki masonlar yarıqaranlıq otaqlara yığışırlar, əyinlərində həmişə qəribə geyimlər olur, üzlərinə kölgə düşür, sərt, bariton səs tembrləri var, əllərində daima qələmlərlə oynayırlar. Kiminsə işini “həll” edəndə qələmlərdən birini qırırlar və s.

Konpirologiya elminin əsas simalarından biri Aleksandr Duqin sayılır. “Velikaya Rossiya” xəstələrinin ilham mənbəyidi. Onun yazılarına inansaq dünya Rusiyaya qarşı birləşib “ayı”nın dərisini üzmək istəyirlər. Bu müəllifin Azərbaycanda ən sadiq pərəstişkarı heç şübhəsiz Həmid Herisçidi.Ailə ənənnəsini davam etdirdiyini deyərək solçu olduğunu deyən Herisçi ilk tanınmağa başlayan gündən mistika uzmanı kimi bilindi. Hər hansısa hadisənin altında mistik izah axtardı. Hətta dünya tarixində əhəmiyyətli olan siyasi hadisələrdə mütləq nəsə qeyri adilik axtarıb tapırdı. Solçu-mistik iyasi mövzulardan bezib keçdi lokal mistikaya. Başladı Azərbaycandakı pirləri araşdırmağa. Telekanalizasiyalarımızın vətənpərvəri olan ANS-in vasitəsilə. O pir mənim, bu pis sənin başladı pirşünaslığa. Ziyarətgahları elə qələmə verirdi ki sanki CERN mərkəzində işləyən alimlər səhv yoldadılar. “Tanrı hissəciy”ini gərək Azərbaycandakı pirlərdə axtarsınlar. O qədər xərc çəkib yerin altında nəhəng labarotoriyalar qurmağa ehtiyac yoxdu.

Araşdırdığım qədəriylə A.Duqinin kitablarında pirlər haqda heçnə yoxdu. O müəllif daha çox Qərbi yıxıb sürüməklə məşğuldu. Siyasi hadisələrə pirlərin təsirini də elmə H.Heresçi gətirər.

Dahi piroloqun son konspirologiyası ABŞ-ın dindən imtina edənlərə pul paylamağı ilə bağlıydı. Belə ki, Rafiq Tağının dindarların tələbiylə həbsindən sonra bir neçə yazar buna etiraz olaraq islamdan çıxdıqlarını elan etdilər. Həmidin iddiasına görə də ABŞ səfirliyi bir qrup yazarı yığıb hanısa tədbirə və islamdan imtina edənlərə müəyyən məbləğ (deyəsən 300 dollar) veriblər. Həmidin quşları arada bir olsa da bu lap şedevr idi. Çünki Amerika kimi ciddi dövlət belə riskli addıma getməzdi. Çünki hansısa bir hadisənin çox insan tərəfindən bilinməsi onun ictimaiyyətə çıxma ehtimalını artırır. Belə bri olayın üstünün açılması nəticəsində ABŞ-ın necə bir qınağa tuş gələcəyini orta statistik düşünmə bacarığını olan hər kəs bilər. Azərbaycanın da həssas bölgə olduğunu hamımızdan yaxşı bilən Amerikanın buna getməsi Azərbaycanın Lazım gəlmədən Qarabağa girməsi kimi bir şey olardı.

Həmid mövzusundan qayıdaq Azərbaycandakı konspirologiyaya. Bir zəruri qeydi edim ki konspirologiya ilə ilgilənənlərin zamanla reallıq və məntiq problemləri yaranır. Bunu özümdə və çevrəmdə dəfələrlər müşahidə etmişəm.

Yaxın Şərqdə son zamanlar baş verən hadisələr milli konspiroloqlarımız üçün bol vəsait verir. Xüsusən çayxanalarda beynəlxalq münasibətlərdəki sirrlər çözülür, qaranlıq güclərin qaranlıq siyasətlərinə aydınlıq gətirilir. Elə bil Ağ Evdə, pentaqonda, İngiltərənin lordlar palatasında, Avropa Birliyin dəhlizlərində nə söz söhbətlər olursa bizim konspiroloqlar xəbər tuturlar. Mərkəzi Kəşfiyyat İdarəsinin patronun masasına gedən bütün “top secret” sənədlərinin bir kopyası Azərbaycandakı çayxanalara gəlir. Harada nə münaqişə varsa bizimkilər anında səbəbkarı və səbəbi bilirlər. Nədənsə həmişə günahkar Amerika çıxır. ABŞ-ın yemiş olduğu və indi də yediyi qələtləri danmıram. Əksinə bir çoxlarından daha yaxşı xəbərim var. Lkain bizim “hərşeyşünasların” nədənsə unutduğu bəzi məqamlar da var. Əgər bütün hadisələrin altından ABŞ çıxırsa demək oralarda hər şey Amerikanın nəzarətində olmalıdı. Başqa dövlətlər (Qərbdən başqa) maraqlı deyil. Rusiya, Çin başını aşağı salıb sadə həyatlarını yaşayırlar. Hələ üstəlik bu zalım imperialistlərə qarşı mübarizə də aparırlar. Qəti onlarlıq deyil ha

Normal məntiq deyir ki işğalçı güc işğal etdiyi yerdə sabitlik istər ki, oranı sömürsün. Yeraltı, yerüstü sərvətlərini sabitlik işığında görmək əlverişlidi. Amma əvəzində nə görürük. Amerika İraqdakı nefti çıxardıb gəlirini götürür. Bir tərəfdən də İŞİD-ı fitilləyib elə öz neft quyularını

Tutub neft istehsalatını dayandırsın? Burada Rusiyanın, Çinin rolu ola bilməzmi?

Rusiyanın başı Ukraynada qarışıqdı. Krımın işğalına, üstəgəl də Ukraynanın şərqində seperatçılara dəstək verməsinə görə Rusiya dünyada mənfi mənada diqqət mərkəzindədi. Ciddi basqılara məruz qalır. İstəməzmi ki diqqəti azacıq da olsa başqa səmtə yönəldib rahat nəfəs alsın? Axı Rusiya Yaxın Şərqdə həmişə kifayət qədər rol alıb. Ərəb ölkələrində millətçi sosial BAAS partiyaları onun xeyir duasıyla qurulub. Əvvəllər İsrail yanlısı SSRİ sonra anti-İsrail olub. FƏTH-in əsas dəstəkçisi də elə SSRİ idi. Fələstinli gənclər ali məktəblərdə oxumaq adıyla Sovetlərin hərbi məktəblərində təlim keçib qayıdırdılar.

Bu coğrafiyada marığa yatan Çin və İran da nədənsə unudulur. İlk baxışda Çin maraqsız kimi görünsə də əsas neft aldığı bölgədi Yaxın Şərq. Burada baş verən hər hansısa qlobal hadisə onu birbaşa ilgiləndirir. Iran barədə isə uzun uzadı danışmağa məncə lüzum yoxdu.

Unutmadan Ərdoğan Türkiyəsini də vurğulayın. Ona görə Ərdoğan Türkiyəsi ibarəsini istifadə edirəm ki qardaş ölkə artıq Atatürkün qoyub getdiyi “Yurdda sülh, cahanda sülh” prinsiplərindən sürətlə uzaqlaşır. Sünniliyi yeni dövlət ideologiyası seçən RTE getdikcə ölkə içində, ölkə xaricində bütün sabitlik qalalarını dağıdır. Ölkə içində bütün müstəqil qurumlara savaş açıb özünə tabe etdirməklə məşğuldu. Ölkə bir biriylə düşmən kəsilmiş qüvvələrə bölünüb. Xaricdə isə “qonşularla 0 problem” siyasəti nəinki fiaskoya uğradı, həm də gerçək niyyətləri ortaya çıxdı. Aydın oldu ki, RTE Türkiyənin istiqamətini yenidən ərəb şərqinə yönəldir. Osmanlını yenidən diriltmək istəyir.Əərəb ölkələrində baş verən inqilablarda hadisələrə yön verən ölkə olmaq istəsədə bambılı vəziyyətinə düşdü. Son olaraq Suriya məsələsində Ərdoğan hökumətinin radikal islamçılara silah, təlim, tibbi xidmət yardımları etməsinin ortaya çıxması Türkiyəni bir daha çətin vəziyyətə saldı. İŞİD-a gedən TIRlarla silah-sursatlar, pullar, ləvazimatlar çoxları üçün gözə görünmür nədənsə. Hələ üstəlik qulağının dibində kürd federasiyasının özünü müstəqil elan etmə cəhdini də görməməsi.

Sonda milli konspirologiya həvəskarları üçün daha gizəmli temalar verim. Rusiyanın Qarabağ savaşındakı birbaşa və dolayısı rolu, ölkədən çıxarılan 48 milyard pul, Dubay villaları, pulların büdcəyə gələrkən və büdcədən çıxandan sonra sirrli şəkildə yoxa çıxmaları. Valla bunlar masonlardan da çox maraqlı mövzulardı. Həm də birbaşa sizin həyatınızla əlaqəlidi.

• 1
• 2
• 3
• 4
• 5