Qarışıq yuxular Gündəm

  • Tanrıverdi Nağıyev
  • 16-06-2014 23:28
  • 74350 baxış
  • şərh
  • ,

Qarışıq yuxular

Qabaqlar belə olduğumu xatırlamıram.Başa düşə bilmirəm bütün bunlar nə deməkdi.Hər gün gecələr qarma-qarışıq yuxular görürəm... Həyatda heç vaxt ünsiyyətdə olmadığım, tanımadığım insanların, müxtəlif əcaib məxluqların çağrılmamış qonaqlar kimi yuxularıma soxulub məni sorğu-sual etmələri adət halını almışdı. Nə qədər özümü görməməzliyə vursam da, gözlərimi yumub üzümü yana çevirsəm də bir nəticə vermir.Yenə önümdə onları görürəm.Səhərlər yuxudan ayılanda ağır təəssüratlar altında başımda ağla sığmaz fikirlər qəlbimdə anlaşılmaz hisslər duyğular bir-birini əvəz edir. Mənə elə gəlir ki havalanmaq, dəli olmaq həddinə çox yaxınam. Fikirlərimi cəmləşdirməyə çalışsam da alınmır...Sanki içimdə şeytan əyləşib hiss duyğularımı qarışdırmaqla məşğuldur...Tez-tez gicgahlarımda küt ağrılar əmələ gəlir.Həkim psixiatırlarımıza etimadım qalmadığından onların yardımından istifadə etmək fikrindən də vaz keçirəm. On beş il bundan öncə əmim oğlu Şahmurad Moskvada böyük qardaşı Hacımuradın yanında "Lüjnikidə"pal-paltar ticarəti ilə məşğul olan zaman "Skenxetlər" tərəfindən hücuma məruz qalmışdı.Fiziki-psixoloji təyziqlərə,eyni zamanda çoxlu pul-itgisinə uğradığından güclü ruhi sarsıntılardan əziyyət çəkirdi. Özünə gəlmək,toxtamaq üçün qardaşı onu bir müddət doğmalarının içində, el-obada qalmağı,tanınmış pisxoterapevtlərlə görüşüb bir kurs müalicə götürməyi vacib bilib rayona ( Ağstafaya)gətirmişdi.O həkim qalmadı göstərməyək. Əlac tapılmadı ki tapılmadı!..Axırda məcbur qalıb Bakıya Abbasqulu adında yaşı 70-80 arası,başının ortası daz,yanlarda ağarmış saçlarını guya dazını gizləyəcəkmiş kimi altdan yuxarı daramış,boydan xeyli uca məşhur bir psixiatrın qəbuluna -evinə aparmalı oldum.100 manat müqabilində "ani baxış" keçirməyə razılaşdıq.Arıq sifətini bir az da uzun göstərən burnunun ucunda ilişib qalmış parıltılı eynəyinin altından sübh tezdən səmada öləziyən ulduzları xatırladan göy gözlərini qıyaraq qoca professor 27 yaşı yenicə tamam olmuş əmioğlunun əsəbi gərginlikdən əyilmş, yaraşıqlı çöhrəsinə baxıb,ürək parçalayan iniltisini dinləyəndən sonra -qatı "Şizafreniyadır" müalicəsi uzun çəkəcək -deyərək "diaqnoz" qoydu.Kor-peşiman qayıdıb gəldik evə. Nəslimizdə belə ağır ruhi xəstəlikdən əziyyət çəkən olmadığı üçün əmioğlunun müalicəsini öz üzərimə götürdüm. Demək olar ki yayın iki ayını (iyulla-avqustu) hər gün səhər tezdən " Jiquli 07" markalı avtomobillə Şahmuradı da özümüzlə götürüb vaxtımızı Kürün sahilində "Girzan" adlanan ərazidə üç nəfər dostumla birlikdə balıq tutmaqla, əylənməklə keçirdik. Əmioğlu ilk günlər bizimlə bir yerdə qərar tuta bilməsə də 4-5 gündən sonra ana təbiətin qucağında,təmiz havada tədricən özünə gələrək oldu anadan gəlmə sap-sağlam... O gündən nəinki özüm, heç yaxınlarımı da Azərbaycanda həkimlərə müraciət etməyi məsləhət görmürəm.Belə də həkimlərimizi başa düşmək olar...Ölkəmizdəki mövcud ağır maddi durum,dövlətdən aldıqları cüzi maaş onların da mənəviyyatını zədələyib sıradan çıxarmışdır.Odur ki hansına dərdini deyirsən -de, xeyri yoxdur.Xəstəni bilərəkdən yanlış müalicə edib özlərindən tam asılı vəziyyətə salıb sonra da inək kimi "sağmağa" başlayırlar.Belə vicdansızlığa dözməyən ürəyin artan hərarətindən başa ötürdüyü "istinin" təsiri nəticəsində adamın olan-qalan ağlı da "buxarlanır uçur" gedir. Ona görə də -Allaha pənah-deyib özümü talehin ixtiyarına vermişəm...Nə olar-olar... Dost tanış, qohum -əqraba hər şeyi ürəyimə salmaqda, cox fikirləşməkdə görür.(doğrudan da çox fikirləşirəm...səbəbini biləcəksiniz...) Hamı mənə fikir eləməməyi, danışıb gülməyi tövsiyə edir. Qayıdıb deyə bilmirəm ki - ay mənim əzizlərim!Axı mən Qarabağ qazisi Əsgərov Əsgər Zabit oğlu Ağstafa rayon Dağ ətəyi kənd sakini,ermənilərin torpaqlarımıza təcavüzü başlayan ilk gündən könüllülərin ön cərgəsində Azərbaycanın bütün sərhəd bölgələrində üç il gecə-gündüz döyüşmüşəm! Hələ 1990- cı ildə sovet dövründə Əksiparanın müdafiəsi zamanı ayağımın iki yerindən yaralanmışam! "Atəşkəs" imzalandıqdan sonra isə elimizdə -obamızda hökm sürən işsizlik ucbatından ailəmi dolandıra bilməyib Rusiya Federasiyasına iş axtarmağa getmişəm! Orda başım nələr çəkmiş bir Allah bilir!..Uzun illərdən sonra,ayrılıqdan qəlbim köz-köz olsa da,həyatda ən çox sevdiyim insanları atamı-anamı,qardaşımı itirsəm də yenə də Ulu Tanrının mənə göstərdiyi böyük lütfü sayəsində vətənə qayıda bilmişəm...Fəqət yenə də köhnə hamam-köhnə tas!...Necə ki on il bundan qabaq çayxanalarda millət işsizlikdən domino,nərdtaxta,şahmat oynamaqla baş qatırdı hazırda da həmən məşğuliyyət davam etməkdədir. Uşaqlıq çağlarını mənsiz keçirmiş Qızım Gülüstanla oğlum Orduxan Bakıda ali məktəbdə pullu təhsil almaqdadı.Qızım Pedaqoji Universitetin Tarix fakültəsinin üçüncü ,oğlum isə Memarlıq və İnşaat Universitetində, Avtonəqliyyatın təmiri fakültəsinin ikinci kursunda oxuyurlar. Mən burda olmayanda qohum-əqraba əmi-dayı,xala-bibi sağ olsunlar yaxından hər tərəfli kömək əli uzatmışlar.İndi məni görüb hamısı kənara çəkilmiş.Mən bədbəxt də başıma haranın daşını salım bilmirəm.On beş sot həyatyanı bağımızda meyvə-tərəvəz satışından əldə etdiyimiz gəlirlə ancaq və ancaq bir qarnı ac bir qarnı tox dolanmamızı təmin edə bilirəm.Uşaqların isə təkcə illik təhsil haqqı üçün dövlətə iki min manat rüsum ödəmək gərəkdir.Əgər bir,uzaqbaşı iki ay ərzində onların təhsil haqlarını ödəyə bilməsəm hər ikisi təhsilini dayandırmalı olacaq...Əlac sovet dövründən miras qalmış dədə-baba "pay torpaqlarını" satmağa qalıb.Ona da "yağlı",səxavətli bir müştəri tapmaq lazımdır.İndi bu boyda dərdin-azarın qabağında mən necə fikir,dərd çəkməyim başa düşə bilimirəm??? Müvafiq dövlət qurumları münasib işlə məni təmin etməyə söz versələr də xeyli vaxtdı səs-səmir yoxdu.Əsəblərim tarıma çəkilmiş vəziyyətdə nə edəcəyimi bilmirəm!Narahatçılıqdan,nigarançılıqdan qəlbimin döyüntüsü hər iki qulağımda eşidilməkdədir.Gecələr yatağımda o üz bu üzə fırlanmaqdan çiyinlərimdə ağrılar əmələ gəlib.Azacıq gözümü yumub mürgüləyən kimi özümü cinlərin-şeytanların əhatəsində görürəm.. Qaçmaq mümkün deyil... Əllərimdən tutub bir göz qırpımında qaldırırlar uzunluğu altı-eni dörd,yan-yana iki otaq, qabağı çox da geniş olmayan zaldan ibarət,üstü köhnə "şiferlə" örtülmüş dədə-baba evimizin damının kəlləsinə.Orada saatlarla oturub mənimlə söhbət edirlər. Uzunsoy sifətləri,köz kimi parıltılı iri gözləri, şabalıdı rəngli dağınıq saçları,cılız arıq bədənləri, balaca boyları xoşa gələn olmasa da bir çoxlarının təsvir etdiyi qədər qorxulu da deyillər. Mənə bizim dünyanın təzadlarından uzun-uzadı fəlsəfi mövzularda mühazirələr oxuyurlar.Biri danışır susur o biri onun fikrini inkişaf etdirir:-Sənə baxırıq yazığımız gəlir...Gah ağlamağımız tutur, gah da gülməkdən uğunub gedirik...Elə hey haqq-ədalət tələb edirsən...Başa düşə bilmirsən ki dünyada haqq-ədalət adına heç vaxt heç nə olmayıb!Siz insanlar həmişə məqsədinizə çatmaq üçün o ilahi kəlamlardan bir vasitə kimi istifadə edirsiniz.İstəyinizə qovuşan kimi həmən haqq-ədalət sözlərini yaddaşınızdan bir dəfəlik silirsiniz.Bir-birinizə qarşı ağlınıza gələn əxlaqsızlığa,haqsızlığa yol verirsiniz.Elə düşünürsünüz guya hamı hər şeyi unudub və heç kim heç nə xatırlamır... Bizim yaranışımız,sərgərdan həyatımızın mənası yer üzündə olan cəmi insanları gözə görünmədən,hiss olunmadan "izləməkdən" ibarətdir...Bəzilərimiz insanın ruhunda,qəlbində xeyirxah hisslər,duyğular oyadır,bəzilərimiz isə onu fəlakətə sürükləyirik...Həyatın çətin sınaqlarından "üzü qara"yaxud da "alnı-açıq"çıxanların ümumi siyahasını tuturuq...Qiyamət günü hər kəs bizim "yuxarıya" təqdim etdiyimiz sənədlər əsasında sorğu-sual olunacaq,mükafat və ya cəzasını alacaqdır.Öz aramızdı sən bütün "imtahanları" Əla vermisən."Ah-vay" etmək sənə yaraşmır... Bir başqası təkidlə məni dilə tutur:- Qoşul bizə...Gedək bizimlə onsuz da boş bekarsan.Hər şeyi ürəyinə salırsan-Vətən belə getdi millət belə gəldi! Onsuz da səni eşidən yoxdu! Hərə öz kefindədi! Bizim dünyamızda nə vətən var nə də millət.Nə gecə nə də gündüz var.Yaşayırsan özün üçün. Nə iş yeri, nə yemək- içmək dərdi çəkəcəksən, nə toy pulu, nə yas pulu nə də çay pulu axtaracaqsan...-Hiss edirəm ki bu fəlakətə sürükləyənlərdəndi...lakin özümü o yerə qoymuram.Axıra kimi sakitcə hamısını dinləyirəm.Sonra heç birinin xətrinə dəymədən :-Bağışlayın sizin təklifinizi qəbul edə bilmərəm-deyirəm. Vəziyyətimi olduğu kimi onlara izah etməyə çalışıram. :- Təəssüf ki sizin kimi qayğisiz, azad deyiləm... Həlli vacib dərdlərim var.Ağlınızı o gördüyünüz demokratik avropa ölkələrinə verməyin.O ölkələrdə dövlət yeri gələndə vətəndaşına həm analıq həm də atalıq edir.Bizim ölkədə isə valideynin başına bir iş gələn kimi körpələr düzdə qalır.Ona görə də xahiş edirəm "üz vurmayın" heç vəclə sizinlə gedə bilmərəm. :-Yaxşı-yaxşı fikirləş!Oğul da özü üçündü qız da! Sabah yenə gələcəyik!- deyib yoxa çıxırlar.. Onların yerini tanış olmadığım dünyaca məşhur insanlar tutur .Elə insanlar ki mənimlə onların arasında yerlə göy qədər fərq var. Ancaq düşdüyüm ruhi vəziyyətim düzgün anlaşılsın deyə məcburam birinin adını çəkəm.Təsəvvür edin Rusiya Federasiyasının prezidenti Bladimir Putin. Son bir ay ərzində üç dəfə yuxuma girib.O hara mən hara?! Bir dəfə soruşdum :-Cənab prezident nə üçün məhz yuxuma girib fikirlərinizi mənə bildirirsiniz? Dedi :-Siz Rusiyada uzun illər yaşamısınız.Özü də ən ağır şəraitdə...Həyatın hər üzünü görmüş bir adamsınız.Bizim rus milli xarakterimizi,adət -ənənəmizi çoxlarından yaxşı bilirsiniz.Ümid edirəm məni daha dərindən anlayıb,başa düşən Siz olacaqsınız. Bildiyiniz kimi dünya,xüsusilə də Amerika başda olmaqla qərb ölkələri,şərqdən də Yaponiya, Çin biz rusları bir millət kimi məhv edib təbii sərvətlərlə zəngin ərazilərimizə sahib çıxmaq istəyirlər.Keçmiş sovet respublikalarını,eləcə də Rusiyanı onların məkrli siyasətlərinin acı nəticələrindən qorumaq üçün mən Rusiya prezidenti kimi əlimdən gələni əsirgəmirəm... Ukraniyada baş verən hadisələr əslində Rusiyanı münaqişəyə cəlb etmək üçün baş planın tərkib hissəsidi.Kənarda qalmağa,təxribatlardan yayınmağa çalışsaq da alınmır.Hadisələrin sürətli inkişafı bizi istər-istəməz konfliktlərin iştirakçısına çevirir.Ona görə də Sizdən xahişim odur ki ,Azərbaycanda Rusiya meyllilərlə birləşib yaranmış "kritik" vəziyyəti düzgün qiymətləndirərək ölkənizdə avrointeqrasiya tərəfdarlarının səhv mövqe tutduqlarını onlara izah etməklə gələcəkdə baş verə biləcək fəlakətlərin qarşısının alınmasında fəal iştirak edəsiniz. ...Bu Sizin vətəndaş borcunuzdur.Unutmayın ki Avropa sizin qara qaşınıza-qara gözünüzə aşiq olduğu üçün yox neftinizə-qazınıza görə sizə öz ağışunu açmışdır...Əgər sözlərimə şübhəniz varsa bu halda Türkiyəni xatırlayın...İyirmi ildən çoxdur ki avropalılar türkləri müxtəlif bəhanələrlə "bortdan" kənarda saxlayırlar.-İstədim türklərin "kürd problemini" xatırladım tez də dilimi dişləyib susmağa üstünlük verdim... Növbəti dəfə yuxuda mənə"qonaq" gələndə bir az içgili həm də əsəbi idi...-Siz müsəlmanlar Amerikanın və müttəfiqlərinin yaxın şərqə hansı "demokratiya" dövlət üsul- idarəsi gətirdiklərini unutmamalısınız-deyərək bir başa hücuma keçdi. -İraqda,Misirdə,Liviyada,Suriyada bu gün də axıdılan qanlar dediklərimi bir daha təsdiq etmiş olur.Bilməlisiniz ki dünyada mütləq ədalət,demokratiya yoxdur.Baş verən sülh-əmin amanlıq, yaxud da böyük müharibələr böyük dövlətlərin toqquşan ya da üst-üstə düşən maraqlarından doğa bilər... -Mən bərəlmiş gözlərimi onun ilan gözləri kimi soyuq, parıldayan gözlərindən ayıra bilmirəm.Sanki o bir "anakonda" dır məni udmaq istəyir.Lal-dinməz qulaq asıram. Mənim "gipnoz" vəziyyətimdən vəcdə gələrək daha da həvəslə danışmağa başlayır.-Sovet dövrünü təsəvvür edin;SSRİ dünyada sülhün qarantıdır! Əfqanıstanı çıxmaqla yer kürəsinin bütün güşələrində əmin-amanlıq hökm sürür!Hamı öz işi ilə məşğuldu.Qorbaçov kimi əbləhin ucbatından SSRİ dağıldı.Dərə xəlvət tülkü bəy dövrü başladı...Bundan sonra dünyada nələr baş verdi gəlin birlikdə sadalayaq. Yuqoslaviyanı parçaladılar!Saysız -hesabsız insanlar qətlə yetirildi!Arxasınca İraqın üstünə yeridilər.Səddamı, Stalinə bənzər bir hökmdarı oğru-quldur əvəzi dar ağacından asdılar!.Liviyanı!Qəddafini! Misiri! Hüsnü Mübarəki! Suriyanı! Bəşər Əsədi bütün bu olayları göz önünə gətirək! Tam məsuliyyətlə bəyan edirəm:Dünyada tökülən qanların günahkarı,səbəbkarı ancaq və ancaq ABŞ-dır! Mən bir anlıq özümü unuduram... Azərbaycanlılarla Ermənilərin on illərdi qanlarının axıdılmasında kimlərin günahkar olduğunu soruşmağa cəsarət edirəm.Vladimir Vladimiroviç:- tələsməyin onu da izah edəcəm deyərək - əsəbi tonda sözümü kəsir.Çətinliklə də olsa mənim üçün ən vacib olan mövzunun üstünə gəlirik.:-Fikirlərimi əsaslandırmaq üçün münaqişənin yaranma tarixinə nəzər salmalıyıq-deyə o sözünə davam edir. -Qorbaçov hakimiyyətə gələn kimi sovet ideologiyasına tamamilə zidd olan "Aşkarlıq,demokratiya" siyasəti yürütməyə qərar verdi.Artıq ardıcıl silahlanmanın, həmçinin qeyri düzgün iqtisadi siyasətin sayəsində ölkə çökmək üzərə idi.Dükanlarda ərzaq məhsulları kəskin dərəcədə azalmışdı.Bir sıra məhsullar ət,yağ,kolbasa məhdud çəkidə, özü də xüsusi "talonlarla" əhaliyə verilirdi.Zavodlarda,fabriklərdə,tarlalarda ağır zəhmətə qatlaşan sovet vətəndaşları onlara verilmiş hüquqi-siyasi sərbəstlikdən ruhlanaraq yaranmış qıtlığa öz narazılıqlarını ifadə etməyə,müxtəlif aksiyalar,kütləvi tədbirlər həyata keçirməyə başlamışdılar.Bizim əzəli,əbədi düşmənlərimiz olan ABŞ,İngiltərə və.s.dövlətlər öz casusları vasitəsilə fürsətdən istifadə edərək müttəfiq respublikarlarda baş qaldırmış millətçilər arasında müstəqillik ideyalarını yayıb, təbliğ etməklə "prosesi" sürətləndirdilər.Qorbaçov Suda boğulan adam saman çöpündən yapışan kimi nə etdiyinin fərqində deyildi...Sumqayıt hadisələrini törətməklə sanki qaş düzəltdiyi yerdə göz çıxardı...Beləliklə Ermənilərlə Azərbaycanlılar arasında unudulmaqda olan keçmiş düşmənçəliyin tam sağalmamış yarasının qaysağını qoparmış oldu...Bundan başqa bildiyiniz kimi Mixail Serqeyeviç öz axmaqlığı ucbatından parçalanmaqda olan nəhəng dövləti xilas etmək üçün nəinki sizi, eləcə də gürcülərlə abxazları,asetinləri bir-birinin üzərinə qaldırdı.Onun düşüncəsinə görə "Guya başınız "didişməyə" qarışacaqdı müstəqillik haqqında söz-söhbətləri də unudacaqdınız..."Bakıda, Tibilisidə, Pribaltikada törətdiyi qırğınlara baxmayaraq heç nə edə bilmədi...Sonra isə Qafqazda böyük dövlətlərin toqquşan iqtisadi-siyasi maraqları münaqişlərin daha da dərinləşməsinə səbəb oldu... Sonuncu dəfə "görüşəndə" əməlli-başlı içkili olduğu hiss olunurdu...Üstəlik kefsiz görünürdü...-Xoş gördük!- deyib ürəyini boşaltmağa başladı:-Mən imkan verə bilmərəm ki Amerika okeanın o üzündən gəlsin bizim qonşularımızı üstümüzə qaldırsın!Bu qətiyyən yol verilməzdi!!! Bilirsiniz bu yaxınlarda vəziyyətlə əlaqədar Yerevana getmişdim. Sarkisyanla təkbətək görüşdə aramızda olan söz-söhbəti,ona verdiyim təlimatlardan sizin də xəbərdar olmağınızı vacib hesab edirəm.Söhbətimizin bir başa sizə də aidiyyəti olduğu üçün düşünürəm hər şeyi bilməyiniz "ümumi işimizə"daha çox xeyir verə bilər. Dedim -Serqo (hərdən onu belə də çağırıram) olmaya -bilməyə mənim icazəm olmadan Qarabağdan qoşunları çıxarmaq fikrinə düşəsən!Sənin yaxın ətrafında mənə sadiq adamlar çoxdu. Atdığın hər addımından xəbərim olur.Bunu biləsən... Odur ki, çalış özünü "yandırma..." Məni aldatmağı ağlına belə gətirmə. Mümkün deyil. İlham qədər olmasam da Heydər Əliyevin məktəbində 1-2 il mən də oxumuşam. Yeri gəlmişkən İlhamın Heydər Əliyevin oğlu olduğunu qəti yadından çıxarma .Atası kimi son dərəcə hiyləgər və ağıllıdır. O söz verməyi əla bacarır ancaq verdiyi sözün heç birinə əməl etmir. Bir dəfə ona dedim (aramızda bir haqq-hesab olmuşdu...) niyə vədinə, sözünə əməl etmirsən? Mənə nə desə yaxşıdı? Dedi:-"Atam mənə daima xatırladardı:-"İlham çalış həmişə aldat. Aldanmağı qəti özünə rəva görmə! Siyasət incəsənətin ən incə növüdür...Ağ yalana həqiqətdən elə bəzəkli gəlin paltarı geyindirməlisən ki ən mükəmməl zövq sahibləri də baxıb heyran qalsın..." İndi özün siyasət adamısan bilirsən ki aldanmaq uduzmaq deməkdir. Uduzan adamın da uduzduğunu geri tələb etməyə haqqı yoxdur".- Düz sözə nə deyəsən?.. Uduzduğumu boynuma aldım mövzunu bağladım. Bütün bunları ona görə sənə deyirəm ki, onunla görüşəndə ayıq- sayıqlığını itirməyəsən.Qafqazda olan əbədi maraqlarımız haqqında bir daha Serjikə xatırlatdım. Bölgədən çəkilməməyimizin, Dağlıq Qarabağ probleminin həllinə nə üçün imkan verməməyimizin səbəblərini də hər tərəfli izah etdim :-Əgər Rusiya Dağlıq Qarabağ probleminin həllinə maneçilik törətməyib kənara çəkilərsə bu zaman hər iki Respublikaya təsir rıçaqların itirmiş olur. Heç bir Minsk qurupuna da ehtiyac qalmır. Onu da deyim birdəfəlik bilin -adını tez-tez çəkdiyiniz o yarıtmaz qrupu münaqişənin həlli üçün yox sonsuza qədər uzadılması üçün biz yaratmışıq.İyirmi il yox əlli il də keçsə yenə də Rusiyanın razılığı olmadan Qarabağ problemi həllini tapa bilməz.Bizim maraqlarımız bizdən tələb edir ki münaqişənin həllinə qəti imkan verməyək. Səbəb düşmənçəlik yox -"işgüzar xarakter" daşıyır... Təsəvvür edin, biz çəkilirik kənara... Siz ,ermənilərlə azərbaycanlılar dil tapıb böyük sülhə imza atırsınız. Münaqişə həll olunur. Hər iki ölkə sözün əsl mənasında tam müstəqillik qazanır.İnkişaf edir, güclənir, arxasını çevirir şimala-üzünü tutur qərbə... Bunun da nə demək olduğunu ümid edirəm başa düşməyəcək qədər küt deyilsən. NATO gəlir burnumuzun ucuna! Raketlərini qurur Kreml cəhənnəmə , düz mənim kabinetimi nişan alır. İndi mənim yerimdə sən özun ol nə edərsən?Çəkilib gedərsən? Əlbətdə ki yox ! Məntiqlə düşünəndə vəziyyəti aydınca görmək olur. Böyük Rusiyanın yaşaması, ayaqda qalması üçün Dağlıq Qarabağ problemi içinə qoca heyvan əti doldurulmuş böyük bir qazan kimi qapağı da ağzında zaman-zaman "qaynamalıdı"... Etiraf edirəm divin canı şüşədə olan kimi Rusiya Federasiyasının da canı Dağlıq Qarabağ probleminin həllinin nə qədər uzun çəkəcəyindən asılıdır.Aydındır ki xalqlarınız yorulub, qan axır, snayperlər gənc əsgərləri qətlə yetirir,göz yaşları qurumaq bilmir, inkişaf dayanıb.Ancaq nə etmək olar?.. Hazırda özün görürsən ki başqa çıxış yolu yoxdu! Son olaraq səni bir daha xəbədar edirəm mənimlə məsləhətləşmədən heç bir addım atmırsan! Başımın üstündən "iş" gördüyünü bilsəm səni Andranikdən pis günə salacam. Bilirsən də o vaxt türk dövlətinə etdiyi xəyanətə görə Andranikin bir qulağını türklər necə kəsmişdilər?.. Sən mənə xəyanət etmiş olsan iki qulağını da kəsilmiş bil! Vladimir Vladimiroviç sözünü tamamlayıb,adamın canına üşütmə salan "zəhərli baxışlarını" gözlərimin içinə dikərək.:-Səhv etmirəmsə bu el məsəli azərbaycanlılara məxsusdur :-"A qızım sənə deyirəm a gəlinim sən eşit"?-Özümdən asılı olmayaraq hərbi qaydada cavab verirəm :-Elədi ki var!-Onda sözlərimi sırqa əvəzi qulağınızdan asın:-Ya mənimləsiniz -"Avrasiya Kömrük İttifaqı"na qol çəkirsiniz ya da Dağlıq Qarabağda "Qazan" həmişə "qaynayacaq!.."deyərək "sağollaşmadan" çıxıb gedir... Yuxudan ayılanda tərdən islanmış bədənimi əsməcə tutmuşdu...Həyəcanımdan tənginəfəs olmuşdum.Nə qədər öz-özümə boş şeydi...Adi yuxudu- deyib təsəlli tapmağa çalışsam da xeyli özümə gələ bilmədim.Putinin təhdidlərini yadıma saldıqca əsəblərim daha da tarıma çəkilirdi.Öz şəxsi problemlərimi xatırladım.Birdən ağlıma gəldi:-Yəqin o da mənim kimi vəziyyətdən çıxış yolu tapa bilmir... Gözlərimi gəzdirib divar saatına baxdım.Səkkizə qalmışdı.Evdəki sakitlikdən həyat yoldaşım Rəfiqənin Bakıdan uşaqların yanından hələ qayıtmadığını anladım."Bakı-Qazax" qatarı 11-12 arası Ağstafaya çatır.-Fikirləşdim Yaxşı ki halımı görmədi.Yoxsa məni yenə cin boğduğunu zənn edib şübhəsiz çox qorxardı...(bu qorxulu yuxunun həyacanını 2013 dekabr ayının ikisindən-üçünə keçən gecə yaşamışdım...) Gedəsi bir yerim olmadığı üçün durub idman paltarımı geyinib,əl üzümü yuyub,təmiz dəsmalla qurulanıb həyətə düşdüm. 10-15 dəqiqə ərzində müxtəlif bədən tərbiyəsi hərəkətləri yerinə yetirdikdən sonra əhval-ruhiyəmin nisbətən düzəldiyini hiss etdim."Səhər gəzintisini" bitirib mətbəxə keçib çay dəmlədim.Televizoru açıb çay süfrəsi arxasında ANS -dən "Salam Azərbaycan" verlişinə tamaşa etmək istədim. Reklamlar "gedirdi..."Xəbərlər proqramının aparıcısı Elnarə xanımın-əziz tamaşaçılar sizi şad xəbərlər gözləyir xahiş edirəm kanalı dəyişməyin - deməsi diqqətimi cəlb etdi. Nəinki ANS-in,azərbaycanda telekanalların heç birinin ciddi xəbərlərə vaxt ayırmadığını bildiyimdən əvvəlcə əhəmiyyət vermək istəmədim .Ancaq Elnarə xanımın tonu fikrimdən dönmək üçün əsas oldu.Fikirləşdim bəlkə Möhtərəm Prezidentimiz işğal altında olan torpaqlarımızı düşməndən azad etmək üçün səfərbərlik haqqında fərman imzalayıb.Düzü Putinlə gecə "aramızda" olan söhbəti,onun qaş qabaqlı sifətini xatırlayıb bu fikirdən vaz keçdim... Sonra da ağlıma gəldi, bəlkə yeni il qabağı əhalinin komunal xidmətə olan borclarını "silmək" üçün nə isə xeyirxah bir şey fikirləşiblər. Bəlkə Seçkilərdə həyata keçirdikləri saxtakarlığın ürəklərdəki acısını yumşaltmaq məqsədi ilə "humanist addım" atmaq qərarına gəliblər. Mən bu bəlkələr içində beynimi silkələyib, araşdırmalarımı davam edirdim, elə bu zaman diktor özünü "yetirdi".Həyacanlı dəqiqələr içində səbrsizliklə gözlədiyimiz "şad xəbərləri" elan etdi :-Əziz tamaşaçılar demədi- deməyin... Gözünüz aydın! Tarif şurası enerji daşıyıcılarının nə az nə də çox düz 30 faiz qiymətini artırmağa qərar verib.-Sanki məni elektrik cərəyanı vurdu.Yerimdən dik atıldım! Necə yəni?! Ola bilməz!!!Bu mümkün deyil!!! Rusiyadan başqa ,bütün dünyada neft-qaz ölkələrində əhali kommunal xərclərdən azaddır!Bizdə də günü-gündən qiymətlər azalmaq əvəzinə nədən artmalıdır ki?!Bu nə deməkdir?!.. Axı ölkəmizin əhalisi cəmi Doqquz milyon nəfər təşkil edir.Bu böyük bir şəhərin əhalisinin sayı qədər də deyil!.. Təsəvvür edin az-maz xoş umidlə dolmaq istəyən ürək bankdan kredit götürüb vaxtlı-vaxtında ödəyə bilməyən, buna görə də tez-tez məhkəməyə çağırılan vətəndaşın acıları ilə birdən-birə necə yüklənir!.. Üzr istəyirəm ifadəmə görə, yenidən "qanım it qanına" döndü. Özüm-özümü xəbərlərə baxdığıma görə bir daha danladım:-Axı sən bilirsən bizim telekanallarda hansı "şad xəbərlər" ola bilər?!.. Bir az da Elnarənin dalınca deyinəndən sonra kanalı dəyişdim. Təsəlli tapmaq, ürəyimi sakitləşdirmək üçün milli problemlərimizə həsr olunmuş səviyyəli veriliş sorağında ekranı "Vərəqləməyə"başladım. Pah! İctimaidən nə görsəm yaxşıdır?!..Həmişə "CARÇI" xəbər proqramının əvvəlində bizi dünyaya məzlum,soyqırıma,işğala məruz qalmış bir millət kimi təqdim edən kanal, indi də dünyaya "Dünya şöhrətli" xanəndəmiz Alim Qasımovun konsertini yayımlayır...Ustad düşüb "transa" özünə"dağ çəkir". Əlini qoyub qulağının dibinə əyləşib "göyün yeddinci" qatında. Muğamın atasını öldürüb anasını ağladır... Səbrimi basıb dinləməyə calışdım. Düzü hövsələm çatmadı... Özümü saxlaya bilməyib donquldadım -yəqin bahalaşmadan xəbəri yoxdur. Qavalını əlindən yerə qoyur ki...Nə vecinə... Getdim irəli... "ATV"-də Turanı görüb dayandım. Bir vaxtlar onun "ANS"- də"Günəbaxan"-verilişinin aparıcısı olduğu, o illəri xatırladım.İndiki kimi yadımdadı.Onun vaxtında"Günəbaxan" bütün "reytinq"ləri vurub qırırdı.Hökümətə sataşmaqdan qorxmurdu ..Sovet dövründən əhalinin əmanət banklarında qalıb "ölmüş pulları"nı "diriltməklə" məşğul idi. Təqaüdçülərin,yaşlı xəstə insanların həmin pullara böyük ehtiyacı vardı. Buna baxmayaraq Hökümətin həmişə olduğu kimi indi də tərsliyi tutmuşdu. Heç vəclə o pulları qaytarmaq istəmirdi.Turan da dirəşmişdi.İnadla hökümətdən-nə üçün camaatın pulunu qaytarmırsan!-deyə hesabat tələb edirdi. Özünü "Yırtıb tökürdü". Doğrudan da savadlı olmaq ayrı şeydi...Hər səhər bu mövzu ətrafında "Günəbaxanda "qırğın" gedirdi.Yeri gəlmişkən onu da deyim ki qabaqlar ANS-in xalq arasında tamaşaçıları indikindən qat -qat çox idi.Fədakar telejurnalistlər Günün reallıqlarını, ölkə daxilində baş verən qanun və hüquq pozuntularını əks edən canlı reportajlar göstərməklə "qudurmuş" məmurlara "dağ" çəkirdilər. Təəssüflər olsun ANS-də axıradək "tank" kimi gedə bilmədi. Bacarmadılar.Onu da o biri kanallar kimi "sındırdılar" Vaxtilə " ANS-in ulduzları" adlı çox səmimi yazılmış bir şeiri xatırladım ANS-in ulduzları ANS-in ulduzları daha parlaq, işıqlı, cazibədar, yaraşıqlı. Gecəni gündüz kimi, əyrini-əyri, düzü-düz kimi, Ölkədə nə baş verir, Hər şeyi bir-bir Güzgütək əks etdirir. Günəşin al şəfəqlərini, qızılı tellərini Çəkib öz canına sümürən, Sanki ilkin zərbəni üzərinə götürən, Sonra da ehtiyyatla o nur sellərini Bizim yerə ötürən. Səmada gecə yarı Əridən qaranlıqları... Bədrlənmiş Ay kimi Nura qərq edir ölkəmi ANS-in ulduzları. ***** Sevilin səsi, türkcə ləhcəsi, “zərif çərşənbəsi”, “şənbə gecəsi”, Düşünürəm mən, ən musiqili, əyləncəli verilişdən gözəl. Qulaq as ona, ürəkdən dincəl. Milli ruhdan zövq al, xəyala dal, yüksəl. Sev xalqını, millətini, milli həmrəliyə gəl. Olmasa mənəviyyat, nəyə lazım bu həyat?! O cavan oğlanı, Turanı tanı. Ədalət, qanun sevən insanı tanı. O da özünü oda-közə yaxandı, adı “Günəbaxandı”. Baxır Günəşin üzünə, həqiqətin gözünə. Anladır, izah edir bilməyənə haqqı-hüququ. Mən deyərdim cəmiyyətə, müstəqil dövlətə, ən gözəl qulluqdu, xidmətdi bu. ANS-in ulduzları, “xəbərçinin”, “iç xəbərin” oğlanları, qızları, Xalqın görən gözüdür, Xalqda belə inam var, həqiqətən də onlar: AZƏRBAYCANIN NAMUSLU SÖZÜDÜR! Çox keçmədi Turanı da oradan "qovdular"... Adını da qoydular guya "deputat" seçəcəklər.Bu sözləri xatırlayanda məni həmişə gülmək tuturdu.-Bizim ölkədə "Eləsini" heç deputat seçərlər?.. Arada xeyli görünmədi.Bir də eşitdim dostum özünü "salib"ATV-yə. Əlbəttə onu kimiləri uzun müddət boş -bekar qalmaz... Ancaq yamanca "qazını"alıblar.Heç elə bil əvvəlki Turan deyil.Dili, ağzı özündədi...Yəqin gözünü qorxudublar:-Bir də "dilin atsa" qulağının dibini görəndə televiziyanı da görəcəksən! İndi baxıram atv-səhər proqramında nə isə Ledi-Qaqa adlı birisinin haqqında həvəslə danışırdı. Əsəbi olmasaydım onun belə bir müğənni haqqında sakit şirin-şirin danışığına doyunca gülərdim.Ada bax -Ledi-Qaqa!.. Başımı bulayıb yoluma -axtarışıma davam etdim."Xəzər Tv" uşaqlar üçün cizgi filmi göstərirdi. Sağ olsun bu kanalın rəhbərliyini... Uşaqları heç unutmurlar...Bir anlıq uşaqlığım yadıma düşdü! Heyf deyildi uşaqlıq çağları!.. Nə dərd başa düşürdük, nə də bir qayğımız vardı! Dərindən ah çəkib keçdim "LiderTv"-yə... Keçdiyimə peşman oldum! Məhərrəm ayına baxmayaraq müxtəlif növ spirtli içkilərin reklamı "xüsusi reseptlə" hazırlanmış yüksək keyfiyyətli "məhsullar" haqqında eşitdiyim yüksək fikirlər nəfsimi qıcıqlandırdı...İçkini tərgitdiyimə heyfsləndim. İstədim qaçam dükana borc da olsa bir şüşə o araqdan alıb dadına baxam. Birdən sərxoş vaxtlarımda toyda -şanda camaatı əlimdə bıçaq qabagıma qatıb necə qovduğum yadıma düşdü .-Lənət şeytana!-deyib Bir təhər özümü saxladım.Sanki müsəlman ölkəsi deyilik! Düşündüm-Yəqin Şeyx Babamız bu kanala baxmır.Yoxsa kafirlərə hədlərini çoxdan göstərmişdi... Bəri başdan deyim ki "AzTv"-yə ümumiyyətlə baxmıram.Hər gün səhərdən-axşama dünya musiqisinin incisi olan muğam sənətimizə "sonsuz məhəbbətlərini" nümayiş etdirməklə muğamı gözümüzdən saldılar.Gündə üç dəfə eyni şeyi yeyəndə bezib iyrəndiyimiz kimi, muğamımızdan da eləcə iyrəndirdilər çoxlarını.O qədər muğam-muğam!-deyib haqqında danışıb təbliğ etdilər ki yerdən qalxan cavan-cavan oğlanlar vətənin işğalda olduğunu,millətin bir milyondan artıq hissəsinin öz doğma yurdundan qaçqın və didərgin düşdüyünü unudub,əllərinə silah əvəzi hərəsi bir qaval götürüb sənət meydanında "döyüşməyə" başladılar... Bir də ki bu kanal prezident İlham Əliyevdən, onun rəhmətlik valideynlərinin həyatlarının müxtəlif dövrlərini əhatə edən sənədli filmlərdən başqa heç nə göstərmir. Eyni şeyə də nə qədər baxmaq olar?... Adam bezir axı..Uzaqbaşı göstərdikləri bir də hərdən hollivudun dramatik kinolarıdır.Vəssəlam.Xalqımızın həyatından da dramatiq kino hazırda inanmiram ola bilsin. Elə dramatik kinolara baxmaq istiyəndə də kəndimizin mərkəsinə gedib çayxana, meyxana ətafında içəri daxil olmaq üçün bir-birindən təklif gözləyən adi çay puluna,qəpik-quruşa möhtac insanlara tamaşa edirəm...Elə "zövq alıram" ki,bir ay özümə gələ bilmirəm... Nə isə...təpəmdən tüstü-çıxa-çıxa "pultun" düyməsini basdım...Ekranda "SPEYS" göründü.Əkbər yenə də hansısa bir "xalq artistinin" ad gününü keçirirdi...Aman Tanrım!Müğənni xanımlar,xanəndələr "HopStop" havasına elə oynayırdılar ki əl-ayaqları belə görünmürdü.-Allah sən saxla!-deyib təkrar "ANS"-ə üz tutdum Ekranda "Günəbaxan" -nın yeni aparıcısı, Turanın "çörəyini" əlindən alan İlqar Mikayıl oğlu göründü.Studiyanın mətbəxində müxtəlif ərzaq məhsulları düzülmüş masanın başında dayanıb ləzzətli yeməkləri necə bişirmək barədə tanınmış aşbazdan məsləhətlər alırdı.Ağzımın suyunu yığışdırıb başladım qulaq asmağa. Fikirləşdim, bəlkə imkan düşəndə uşağa ayaqqabı almaq əvəzinə mən də bir dəfə necə lazımdı bazarlıq edib, o dadlı yeməklərdən evdə bişitdirərəm."Gözümüzün qurdu ölər..." Yenicə xəyal plov yeməyə hazırlaşırdım ki Mikayıl oğlu mətbəxdə işini bitirib səhnəyə daxil oldu.Milli məclisdə millət vəkili Fazil Mustafanin ölkəmizdə "velosiped yollarinin çəkilməsi" nə dair irəli sürdüyü təklifə verilişinin daimi iştirakçılarının münasibət bildirməsini xahiş etdi. Tamaşaçılarda yaxşı təsəvvür olsun deyə salona gətirdiyi velosipedlə hətta özü səhnədə geniş bir dairə də vurdu. İlqarın "mövzu qıtlığının"belə dar həddə çatması sadəlöhv insanların sifətində açıq- aydın çaşqınlıq yaratmışdı.Çoxları özünü gülünc,təhqir olunmuş vəziyyətdə hiss edirdi .Günəbaxanın aparıcısı gərginliyi aradan qaldırmaq üçün müsbət təşəbbüslə çıxış edərək həqiqətən də ölkədə velosiped yollarının çəkilişinə böyük zərurət duyulduğuna dair ağiz dolusu danışdı. Ruslar demişkən-:" Опять начиль людямь лапшу на ущы вешать"-yəni adəti üzrə insanların qulaqlarından "əriştə asmağa" başladı... Sayı-hesabı bilinməyən milli dərdlərimiz,məişət problemlərimizlə yanaşı bir anlıq öz şəxsi dərdlərini də unutmaq üçün tamaşaçı qismində oraya yığışan o zavallı insanlara verilişin bu gün ki müzakirə mövzusu qətiyyən xoş gəlmirdi. Onların məyyusluq bürümüş məzlum çöhrələrindən dilxorçuluq yağırdı.Televizoru söndürüb yenidən çarpayıya uzandım. Minlərlə özüm kimi işsizlikdən əziyyət çəkən,bir parça çörək dalınca dünyanın müxtəlif ölkələrinə axışan,qürbət ellərdə iş tapa bilməyib müəyyən səbəblərdən müxtəlif cinayətlər törədib həbsxanalara düşən "ruhi xəstələr" gözlərim önündə canlandı....Qəlbimi topa-topa qara buludlar bürüdü... Gözlərim doldu...Dilim,dilim-dilim olaraq pıçıldadı:-Sən özün bizlərə kömək ol İlahi!..

Qiymət 4.33/5 (86.666666666667%) (3 səs)

Digər xəbərlər

Ruhunu şeytana satan Bulqakov

Frans Hohler. 4 Nömrəli platforma. Romandan parça

Gənc aktyorun yaşlı aktyora rişxəndi

Nasır Mənzuri Bakıda

İntellektlə silahlanmış xurafatçı Həmid Herisçi

Şərhlər