Göy qurşağının rəngləri

Portret şeir-hekayələr

 

Göy qurşağının birinci rəngi

dörd-beş yaşım olanda küçüyüm vardı balaca yumru tüklü şirin

uşaqlıq sevinclərimdən biri idi dostum idi

oynayırdım onunla yedizdirirdim onu tumarlayırdım çimizdirirdim

sonra öldü böyüməyə macal tapmamış qaldı maşınımızın təkəri altında

motorun səsi gizlətdi sınan sümüklərinin xırçıltısını bircə axırıncı zingiltisini eşitdim lap yavaşdan

küçədə basdırdıq onu qardaşımla daşlardan qəbir düzəltdik ona

birinci dəfə onda başa düşdüm ölümün pis şey olduğunu

birinci dəfə onda başa düşdüm ölümün varlıqdan yoxluğa keçid olduğunu

birinci dəfə onda başa düşdüm hamımızın öləcəyini

11 sentyabr 2014 23:36

 

Göy qurşağının ikinci rəngi

Bakı ruslarından idi saçı saqqalına qarışmışdı gözlərinin ağı qızarmış altı torbalanmışdı

biçəklərindəki seyrəlmiş ağ tüklər şapkasının altından boylanırdı bığları siqaret tüstüsündən saralmışdı

avtobusun ikiadamlıq oturacağında pəncərə tərəfdə oturmuşdu

məni saxlayan Allahdı qurban olum ona deyirdi şirin rus çalarlı Bakı ləhcəsində

Kürdəxanıdakı həbsxananın yanından keçəndə mən də burda yatmışam deyib gülümsədi

dayday nöş yatmısan soruşdu uşaqlar nə bilim dedi tutdular da

içib küçədə yatmışdım ayılanda burdaydım bir aylıq salmışdılar məni içəri iki həftəyə buraxdılar

nöşün dayday yenə soruşdu uşaqlar neyniyillər ee məni dedi yanıma gələn yox

peredaça gətirən yox atdılar mitilimi bayıra yerimdə başqası yatar

bəlkə onun yanına gələn olacaq bəlkə nəsə gətirəcəklər ona

Zabratda düşdü məni saxlayan Allahdı ona qurban olum deyə deyə

15 oktyabr 2014 22:21

 

Göy qurşağının üçüncü rəngi

rəsm və əmək müəllimimiz vardı İsmayıl müəllim yaşı əllini haqlamışdı

balacaboy arıq bir az donqar kişiydi çox savadlıydı

kimyanı kimya müəllimindən ədəbiyyatı ədəbiyyat müəllimindən yaxşı bilirdi

amma rəsm və əmək dərsi keçirdi bizə bacarıqlıydı olduqca səliqəliydi həm də

dərsində səs salan uşağın gicgahındakı tüklərdən yapışıb qopardırdı

sonra barmaqlarının arasındakı bir neçə tükü həmin uşağa uzadıb say deyirdi

böyük emalatxanası vardı içində hər cür dəzgahları alətləri avadanlıqları

rusların q hərfi formalı birmərtəbəli köhnə məktəbimizin başdan birinci otağı onun dərs otağıydı

başdan ikinci otağı emalatxanası təzə məktəb tikəndə sökdülər köhnə məktəbin bir hissəsini

ən əvvəl də İsmayıl müəllimin otaqlarını sökdülər dəzgahlarını satdılar

tezliklə İsmayıl müəllim çıxdı məktəbdən bizim məktəbi qurtarmağımızı da gözləmədi

indi yol qırağında icarəyə götürdüyü dükanı işlədir

15 oktyabr 2014 22:27

 

Göy qurşağının dördüncü rəngi

qonşumuz vardı yaşlı arvad idi nəvələrinin kiçiyi mənimlə yaş olardı

şəhərdəydi evləri qonşuluğumuzdakı həyət bağ eviydi onların yaydan yaya gələrdilər ora

yaşlı arvad bütün yayı burda olardı uşaqları nəvələri hərdən gəlib dəyərdilər

yaxşı arvad idi məni çox istəyirdi anamı da sənin kimi qonşu görməmişəm deyirdi anama

sonra yataq xəstəsi oldu huşu da gedirdi hərdən bütün günü qışqırırdı

uşaqlarını söyüb qarğışlayırdı uşaqlar yayı gözləyirdilər ki gətirib atsınlar onu burdakı evə

burda olanda ancaq kiçik oğlu maraqlanırdı onunla çox vaxt yanında qalırdı

hərdən qala bilməsə də bir iki saatlıq imkan tapıb gəlirdi altını təmizləyirdi yedizdirirdi

o arvad bu evdə qalanda nə gəlinlərini gördüm yanına gələn nə də nəvələrini

iki üç il əziyyət çəkdi əziyyət çəkdirdi sonra öldü dekabrın otuzu

bu yaxınlarda qonşuluqdakı evə girdim indi nəvəsi yaşayır orda

xəstələnəndə yanına gəlməyən nəvə indi divara vurub nənəsinin böyüdülmüş şəkilini

18 oktyabr 2014 21:52

 

Göy qurşağının beşinci rəngi

hər dəfə Bakıtaba gedəndə dükanın üstündəki eyvanda təzə yuyulmuş paltarlar sallanırdı

başıma çiynimə damcılayırdı rəngbərəng paltarların suyu məni belə salamlayırdılar

ya evin sahibəsi paltar yuyanda gedirdim həmişə ya da mən gedəndə ev sahibəsi paltar yuyurdu

taleyin ironiyasıydı bu ya da yağışın parodiyası Rasim bəyə də demişdim bunu gülümsəmişdi

sonra dükanın yerini dəyişdirdilər daha izdihamlı küçəyə

dükan köçdü üstündə zivəsində təzə yuyulmuş paltarlar sallanan eyvanı olmayan yerə

yəqin ev sahibəsi yenə paltarları yuyub asır eyvandan

paltarlardan süzülən damcılarsa mənimçün darıxır ola bilsin

26 oktyabr 2014 22:22

 

 

Göy qurşağının altıncı rəngi

Rəşad vardı hərbi hospitalda bir yerdə yatırdıq eyni çağırışda getmişdik xidmətə

amma hərbi hissələrmiz ayrıydı ortaboylu arıq oğlandı qabaq dişləri qızıldandı

evin kiçiyiydi ərköyünüydü atası ölmüşdü anasıyla qardaşları gəlmişdilər yanına bir dəfə

palatada söhbət edəndə anamı çox incitmişəm dedi evdən qaçmışdım bir ara

Bakıya getmişdik uşaqlarla doqquz ay Bakıda kirayədə yaşadıq restoranlarda işlədim

evə zəng də eləmirdim sonra işsiz qalanda qayıtdım Mingəçevirə çox peşmanam elədiklərim üçün

biz hospitaldan çıxanda dayanıb dalımızca baxırdı həsrət yalvarış iztirab tökülürdü baxışlarından

bir dəfə də görmüşdüm onun o baxışlarını anasını yola salanda

peşman idi hər şey üçün anasını incitdiyinə görə də gələcəkdə incidəcəyinə görə də

26 oktyabr 2014 22:40

 

 

Göy qurşağının yeddinci rəngi

doxsan səkkizinci ilin qış aylarından birində Buzovnaya gedirdik anamla

qırmızı rəngli qazeldə dal tərəfdə təkadamlıq oturacaqda oturmuşdum

adamlar minirdilər düşürdülər düşürdülər minirdilər gedirdilər gəlirdilər

bir qız da mindi təxminən on yeddi on səkkiz yaşlarında qarasaçlı qaragözlü göyçək qız

oturduğum təkadamlıq oturacağın qolsöykədməli yeri açılıb oturacaq olurmuş

qız onu açıb yanımda oturdu hərdən mənə baxıb gülümsəyirdi yanaqlarında zənəxdanlar oynayırdı

yəqin ki heç kimi sevmirdi onda yəqin ki hələ ağlamamışdı eşq acısından

yəqin ki həyatın gözəl olduğuna inanırdı hələ yəqin ki həyatının gözəl olacağına da inanırdı hələ

bizdən tez düşdü avtobusdan düşəndə yenə mənə baxıb gülümsədi

əgər onu bir daha görə bilsəm avtobusda metroda dayanacaqda yolda və ya başqa hardasa

soruşacağam bağışlayın bilmirsiniz göy qurşağının axırıncı rəngi hansıdır

11 oktyabr 2014 00:07

• 1
• 2
• 3
• 4
• 5