Çingiz Sultansoy

TƏŞƏKKÜR GÜNÜ TƏŞƏKKÜRÜ

e s s e

Demə, dünyada qeyd olunan bayramlar və günlər arasında bir Təşəkkür Günü də varmış. Bunu eşidib belə gündə boynumda haqqı olan kimlərə təşəkkür edəcəyimi  düşündüm, yaddaşımı varaqladım...

Hamıdan öncə məni yaradan, ömür və bəxt verən Allaha təşəkkür edirəm!  Xüsusən ona görə ki, məndən üç il öncə böyük bacım kimi ölü doğulmuşam, amma həkim məni dirildə bilib.

Sonra dünyaya gətirən, təhsil və başlıcası, tərbiyə verən atama və anama, onların valideynlərinə - nənə və babalarıma, məni dirildə bilən həkimə, 1959-1963-cü illərdə ibtidai məktəbdə əlifba, yazmaq və oxumaq öyrədən Şəfiqə müəlliməm Tağıyevaya təşəkkür edirəm.

Orta və ali məktəbdə, saysız treninq və seminarlarda dərs deyən bütün müəllimlərimə, üzgüçülük, boks və ştanqa trenerlərimə, dəyərli məsləhətini əsirgəməyən, nəsə öyrədən bütün cavanlı-qocalı insanlara, ağsaqqal və ağbirçəklərə, kitablarını oxuduğum, öyrəndiyim bütün işıqlı insanlara, böyük və böyük olmayan qələm sahibləri, yazıçı və mütəfəkkirlərə,  müəllimim bildiyim adamlara  təşəkkür edirəm!  

Birlikdə işlədiyimiz, əlləri qələm, mikrofon və ya kamera tutan həmkarlarıma, veriliş və filmlərimi düşünən, yaradan - planlayan, çəkən, montaj edən rejissor və montajorlara, işıqçılar və sürücülər də qarışıqa qarışıq bütün yaradıcı və texniki heyət üzvlərinə, qələm və mikrofon, ədəbiyyat və jurnalistikanın asan olmayan, bəzən çox çətin, amma şərəfli yollarında irəliləməyə imkan və dəstək verən, ən azı mane olmayan direktor, müdir, redaktor və baş redaktorlarıma təşəkkür edirəm. Müdirlər arasında müxtəlif adamlar olub, ən azı qabağıma kötük dığırlamayan, mane olmayan rəhbərlərimə təşəkkür edirəm!  

Dar günlərimdə məni tək qoymayan, yanımda dayanan, əlimdən tutan, əllərinin və ürəyinin istisini əsirgəməyən, dəfələrlə işsiz qalanda müxtəlif yol və şəkildə kömək edən, ümid verən ya anonim qalaraq pul göndərən, problem və dərd yükümün altına çiynini verən virtual və real dost və qohumlara, müalicə edən həkimlərə, müdafiə edən vəkillərə, həyat yollarında Azərbaycan, Türkiyə, Rusiya və Almaniyada rastıma çıxan, qarşıdakı təhlükədən xəbər verib yıxılmağa və büdrəməyə qoymayan, yardım əlini uzadan, səhvlərimi bağışlayan, söz, fikir və əməlləriylə xoş xatirə buraxan, çox olduqlarında hamısının adını çəkmək mümkün olmayan bütün təmiz ürəkli, məni istəyən dəyərli insanlara təşəkkür edirəm! 

Qədirbilən oxucu və tamaşaçılarıma, real həyatdakı və virtual Facebook dostlarıma, məni anlayan qohumlarıma, bir də gözəlliyi, məlahəti və ya ağlıyla həyatıma rəng, zövq və ilham verən qadınlara təşəkkür edirəm! 

Allah dünyadan köçənlərə rəhmət eləsin, həyatda qalanları qorusun! Var olun, əzizlərim!

• 1
• 2
• 3
• 4
• 5