O həm də ədəbiyyat adamıdır Ədəbi mühit

O həm də ədəbiyyat adamıdır

AZAD  QARADƏRƏLİ

 

                            O HƏM DƏ BİR ƏDƏBİYYAT ADAMIDIR

 

            Son illərdə yaxınlıq etdiyim adamların bir çoxu ədəbiyyat adamı olub. Hətta bundan bir qədər sıxılmışam da. Sirr deyil ki, ədəbi çevrəmizdəki yazı-pozu əhlinin hamısı eyni dad-duz sahibi olmur. Bəzisindən sadəcə yaxanı qurtarmağa çalışırsan. Üstəlik də, yazıçıya heç bir qida verməyən bu çevrədəkilər sənin ruhunu qaraldır öz ədəbi bədgümanlıqlarıyla: “Əşşi, indi yazı oxuyan var?”, “Vallah dünyanın ən axmaq adamıyıq. Bazarı olmayan işlə məşquluq”, “Çörəksiz iş Sizif əməyidir...”

           Yaxşı ki Sizifisə tanıyırlar...

            Nə gizlədim, belələrindənsə, gedərəm gənc yazarlarla çay içərəm, Əkrəm Əylisli ilə dəniz sahilində gəzə-gəzə dərdləşərəm, ya da qəhrəmanlarımın cəm olduğu köçkün yataqxanalarına yollanaram – zatən mənimçün ən rahat yer orası...

            Amma yoox. Burada, ədəbi çevrədə hərdən elə tapıntılar olur ki! Hə, hə! Olur beləsi.

            Hansısa tədbirdən çıxmışdıq. Bir kafedə yığışıb çay içir, ədəbi aləmdəki yeniliklərdən gumuldanırdıq. Rasim Qaraca, Rəhim Əliyev, Namiq Şaman... Qalanlarını unutmuşam. Çoxu gənclər idi. Azadlıq radiosundakı çıxışları ilə yadımda qalan Xədicə İsmayıl da orada idi. Bu xanımın ədəbiyyatçılar çevrəsində nə işi olduğunu düşünmədim belə: ədəbiyyat həvəskarı ola bilər, kiminləsə dostluq edər və sair deyə. Amma bir az sonra Rasim bəyin hansısa bir şeirini özünəxas bir tərzdə ifa edəndən sonra analdım məsələni. Bu xanımın ədəbiyyata aşırı marağı varmış. Və elə oradaca bir sirdən də agah oldum: Xədicə müasir əfqan yazıçısı Xalid Hüseyninin “Çərpələng uçuran” romanını ingiliscədən dilimizə çevribmiş!..

            İkinci görüşümüz Azadlıq radiosunda oldu. Bir az ədəbiyyatdan, iş-gücdən danışdıq. Kitablarımı ona bağışladım. Mütləq oxuyacağını dedi.

            Dostum Elnur Astanbəylinin şeirlər kitabının təqdimatındakı çıxışı indi də yadımdadır. Orada ədəbi aləmdə, siyasi çevrələrdə çox tanınan isimlər vardı və heç kimin çıxışı Xədicənin çıxışı qədər etkiləmədi məni. O təxminən bunları dedi: Elnur bəyin şeirləri fərqlidir. Fərqlilik yazarı yazar edən ən ümdə şeydir. Fərqli deyilsənsə, yazdığın oxunmayacaq, heç kimə lazım olmayacaq... Daha maraqlı sözlər də dedi Xədicə İsmayıl... Və qəribə səs tonuyla Elnurun yeni kitabından şeirlər oxumağa başladı.

            ...Xalid Hüseyninin “Çərpələng uçuran” əsəri bir bessellerdir. Amma həm də əfqan xalqının mücadiləsini, dərdini, məhrumiyyətlərini dilə gətirmək baxımından diqqət çəkəndir. Zənnimcə, Xədicəni də bu əsərə bağlayan eyni hissdir: xalqının azadııq mücadiləsini Xalid Hüseyninin dili ilə ifadə etmək cəhdi...

            Düşünürəm ki, Xədicə oradan – zindandan əliboş gəlməz. Hansısa daha möhtəşəm bir əsərin tərcüməsilə çıxacaq ordan . Yaxud özü nələrsə yazacaq. Axı o həm də bir ədəbiyyat adamıdır.

            

Qiymət 5/5 (100%) (1 səs)

Digər xəbərlər

Hər küçədə minlərlə rejissor var

Səkinə Qərib. ACİZ OLDUĞUNU ETİRAF ET. esse

Gecikmiş mesaj

İnkir, Minkir, Mirşahin...

Həmid Piriyev. Tərcüməçinin notları

Şərhlər