Sənin anan düz eləmədi Cek! Şeir

Sənin anan düz eləmədi Cek!

Rüfət Əhmədzadə

Sənin anan düz eləmədi, Cek

Ey, Cek!
Sənin anan düz eləmədi…
Qızla görüşəndə zəng edib bezdirmədi,
Dostlarla gəzəndə,
“Rədd ol, qayıt xarabana” demədi.
Gecəyarısında qışqırıb qonşuları oyatmadı üstünə,
Onların söyüşləri də bonus gəlmədi,
Bu günə qədər dəymədi şəstinə.
Anan indiyə qədər
Heç nəyi söz eləmədi.
Cek, incimə, sənin anan düz eləmədi!

Eh, Cek!
Sən marixuana çəkəndə,
Gəlib qulağının dibindən ilişdirmədi nəyi var.
Atana döydürmədi barda içib evə sərxoş gələndə...
Sən narkotikə görə həbsə atılanda,
Qızıllarını satıb hakimə rüşvət vermədi,
Sənin anan heç nəyi düz eləmədi, Cek!

Sən həbsdən normal insan kimi qayıtdın evə,
O isə dedi: “get həyatını qur”...
Sənin anan düz eləmədi, Cek!
Sən əvvəl Əfqanıstana,
Sonra da İraqa getdin....
Nə qədər məsumun qanını tökdün.
Anan səni vaxtında “niqodnı” çıxartmadı...
Ləçər anan düz eləmədi, Cek!
Bir qatilin şəklini böyüdüb divardan asdı!

 

Sənin anan düz eləmədi Jak 

Ey Jak, sənin anan düz eləmədi!
Əvvəl Alen Delonun xəyallarıyla yaşadı,
Sonra Belmandonun fanatı oldu...
Hərdən də özünü Qrafinya de Monsoro kimi hiss edirdi...
Qraf Monte Kristonu gözləyirdi...
Ta ki, üç muşkteyorun əlinə düşənə qədər.
Eh, Jak! Sənin anan düz eləmədi!
Ümidini bağlamışdı Jerar Departyeyə...
O da Zidanın atdığı top kimi uçub getdi.
Sənin anan heç seçkidə də düz eləmədi, Jak!
Nəinki sevgidə....
Getdi, ermənipərəst Olanda verdi səsini.
O vaxtdan ananın səsi də gəlmir....
Yenə aradabir salam-zad göndərirdi...
Sənin anan, bizi tez unutdu, Jak!
Biz elə onun simasında görürdük sizin Fransanızı...
Bizə maraqlı deyildi nə Hüqo, nə Mopassan, nə də Balzak!
Sənin ana heç düz eləmədi, Jak!

 

Qiymət 5/5 (100%) (2 səs)

Digər xəbərlər

Seymur Baycan senzuraya qarşı

Bəxtiyar Hidayətin yeni romanı - Gordahat

Bəxtiyar Hidayət - Sabirabad qayçısına ithaf

İntihar etməyənlər, edənləri anlamaz

İsa Hüseynovun Kulis.az-a müsahibəsi: “Düşmənlərim üçün də darıxıram”

Şərhlər