Taleyinin rəqqasəsi
Göbəyini əsdirərək rəqs edən qadın əslində taleyi ilə oynayır. Bəlkə də taleyi onu rəqqasə edir, nə bilmək olar ? Yaşadığı sevgi macəralarını səmimi şəkildə, utanmadan ifadə etməsi sizi təəccübləndirməsin. Savadsız cəmiyyətlərdə səmimi , komplekssiz qadın əxlaqsız hesab olunur. Nabatın düşüncəsinə görə bütün kişilər eynidir. Belə düşünməsi səbəbsiz deyil . Hər gecə müxtəlif kişilərin qoynuna atılan qadını sevmək Azərbaycan düşüncəsinə əsasən qəbuledilməzdir. Ətraf mühitdən, kənar fikirlərdən qorxmayaraq öz həyatını yaşama cəsarətində olmaq ən mükəmməl möcüzədir.
Romanda həmçinin mütləq ənənələrin cəmiyyət üçün yaratdığı mənfi cəhətlərdən bəhs olunur. Bacısını məşuquyla sevişəndə yaxalayan Kərim hər ikisini öldürür və polisə təslim olur. Qadını Mədinə Kərim həbs olunduqdan sonra Camalla sevgili olur. Romanın bu səhnələri çox təsirlidir.
Baş qəhrəman atasıyla bağlı müəyyən hadisələri nəql edir. Bu hissə ata mifiylə bağlı cəmiyyətimiz tərəfindən qəbul edilən müəyyən nəsnələrin tənəzzülüdür. İstənilən toplumun ən böyük problemi kimsəsiz uşaqlar və onların taleyi olub. Atasız qızlar niyə fahişə olur? Bu, tale tərəfindən insanlara verilən missiyadır ya insan öz taleyini özü müəyyən edir ?
Romandan seçdiyim fikirlər :
“ İnsanı həm də həyat eşqi öldürür. ” Mübahisə doğuracaq fikirdi. Bəzən yaşamağı çox arzulayan həyat dolu insan ölümlə qarşılaşır. Ancaq yaşam gücü olmayan, həyata bədbin münasibət bəsləyən kəs uzunömürlü olur. Bir daha sübut olunur ki, dünya ədalətsizdir.
“ Qadınlar bəla və müsibət çiçəkləridir ” Addəm və Həvva söhbətindən bu günədək kişi yaşadığı bütün məhrumiyyətlərə , əzablı güzəranına görə qadını günahkar zənn edir. Əslində bu fikri tam mənada qəbul etmək olmaz. Çünki səbəblərə görə nəticələr dəyişir və dəyişilməlidir. Mədinə nə dərəcədə günahkardır ? Bəlkə tənhalıq onu sındırdığına görə Camalla görüşür ?
Əsər haqqında çox fikirlər yazmaq olar,amma oxucu üçün də düşünmə fürsəti tanımaq lazımdır. Son olaraq gəldiyim nəticə bu oldu ki, gözəllik həm də ləyaqətsizliklərə səbəb ola bilər. Çünki gözəllikdə anlaşılmazlıq, qarşısıalınmaz ehtiras var.
Romanda ən çox sevdiyim cümlələr
“ Mən onu görəndə o, artıq qız deyildi, qadın olmağına isə hələ çox var idi ” . “ Qarının içi qurumuşdu, yüz kişi yığışsaydı, bu qarının bətnində bir toxum göyərdə bilməzdi ”
O qadın dindardır, fahişədir yoxsa rəqqasə ? Bunu seçmək oxucunun öz öhdəsinə düşür. Məncə o qadın nə dindar, nə fahişə, nə rəqqasədir, o , taleyin özüdür.

• 1
• 2
• 3
• 4
• 5